മഞ്ഞുമ്മൽ ബോയ്‌സിലെ ട്രാവൽ സോംഗ് പുറത്തുവിട്ടു. നെബുലകൾ എന്നാരംഭിക്കുന്ന ഗാനമാണ് പുറത്തുവന്നിരിക്കുന്നത്. യുവതാരങ്ങൾ അണിനിരക്കുന്ന ഗാനത്തിൽ മഞ്ഞുമ്മൽ ബോയ്സിന്റെ വിനോദയാത്ര തന്നെയാണ് കാണിക്കുന്നത്. കൊടൈക്കനാലിന്റെ ഭംഗി ഒപ്പിയെടുത്താണ് ഗാനം ചിത്രീകരിച്ചിരിക്കുന്നത്. സുഷിൻ ശ്യാം സംഗീതം നൽകിയിരിക്കുന്ന ഗാനം ആലപിച്ചിരിക്കുന്നത് പ്രദീപ് കുമാറാണ്. അൻവർ അലിയുടേതാണ് വരികൾ.
അതേസമയം ചിത്രത്തിന്റെ അഡ്വാൻസ് ബുക്കിംഗ് ഇന്ന് രാവിലെ 10 മുതൽ ആരംഭിച്ചു. ചിത്രം നാളെ തീയേറ്ററുകളിലെത്തും. യുവതാരനിര അണിനിരക്കുന്ന ചിത്രത്തിനായി വളരെ ആവേശത്തോടെയാണ് ആരാധകർ കാത്തിരിക്കുന്നത്. സൗബിൻ ഷാഹിർ, ശ്രീനാഥ് ഭാസി, ബാലു വർഗീസ്, ഗണപതി, ലാൽ ജൂനിയർ, അരുൺ കുര്യൻ, ദീപക് പറമ്പോൾ തുടങ്ങിയവരാണ് പ്രധാന കഥാപാത്രങ്ങളെ അവതരിപ്പിക്കുന്നത്.
ജാ നേ മൻ എന്ന ചിത്രത്തിന് ശേഷം ചിദംബരം സംവിധാനം ചെയ്യുന്ന സിനിമയാണ് മഞ്ഞുമ്മൽ ബോയ്സ്. ഒരു യഥാർത്ഥ സംഭവത്തെ അടിസ്ഥാനമാക്കിയാണ് ചിത്രം അണിയിച്ചൊരുക്കിയിരിക്കുന്നത്. കൊച്ചിയിൽ നിന്നും വിനോദയാത്രക്കായി കൊടൈക്കനാലിൽ എത്തുന്ന ഒരു സംഘം യുവാക്കളെ ചുറ്റിപ്പറ്റി നടക്കുന്ന ചില സംഭവവികാസങ്ങളാണ് ചിത്രത്തിലൂടെ പറയുന്നത്. ദുരൂഹതകൾ നിറച്ച മഞ്ഞുമ്മൽ ബോയ്സിന്റെ ട്രെയിലറും ഏറെ ശ്രദ്ധനേടിയിരുന്നു. ചിത്രത്തിന്റെ തിരക്കഥ ഒരുക്കിയിരിക്കുന്നതും സംവിധായകൻ ചിദംബരം തന്നെയാണ്.
