ഹാപ്പി ഡേയ്സ് എന്ന ചിത്രത്തിലൂടെ ശ്രദ്ധേയനായ നടൻ നിഖിൽ സിദ്ധാർത്ഥിനും ഭാര്യ ഡോ. പല്ലവിക്കും ആൺകുഞ്ഞ് പിറന്നു. സമൂഹ മാദ്ധ്യമങ്ങളിലൂടെ താരം തന്നെയാണ് ഇക്കാര്യം ആരാധകരുമായി പങ്കുവച്ചത്. ഒപ്പം കുഞ്ഞിന്റെ ചിത്രവും പുറത്തുവിട്ടു. അമ്മയും കുഞ്ഞും സുഖമായിരിക്കുന്നെന്നും ചിത്രങ്ങൾ പങ്കുവച്ച് താരം കുറിച്ചു. 2020 ലാണ് നിഖിലും പല്ലവിയും വിവാഹിതരായത്.
ഹാപ്പി ഡേയ്സ് എന്ന ചിത്രം മലയാളത്തിലടക്കം ശ്രദ്ധനേടിയിരുന്നു. ചിത്രത്തിൽ മികച്ച പ്രകടനമായിരുന്നു നിഖിൽ കാഴ്ചവച്ചത്. കഴിഞ്ഞ വർഷം പുറത്തിറങ്ങിയ കാർത്തികേയ 3 യും നിഖിലിന്റെ ശ്രദ്ധേയമായ ചിത്രമാണ്. മലയാളി താരം അനുപമ പരമേശ്വരനായിരുന്നു ചിത്രത്തിലെ നായിക. മലയാളത്തിലും ചിത്രം മികച്ച പ്രതികരണം നേടിയിരുന്നു.
