ലക്നൗ: സഹാറൻപൂർ ഇസ്ലാമിക പഠനകേന്ദ്രം ദാറുൽ ഉലൂം ദേവ്ബന്ദിനെതിരെ നിയമനടപടിക്ക് ആവശ്യപ്പെട്ട് കത്തയച്ച് ദേശീയ ബാലാവകാശ കമ്മീഷൻ (എൻസിപിസിആർ). ഭാരതത്തിൽ വിശുദ്ധ യുദ്ധം നടത്തണമെന്നുള്ള ഫത്വ പുറപ്പെടുവിച്ചതിന് പിന്നാലെയാണ് ബാലാവകാശ കമ്മീഷന്റെ ഇടപെടൽ. വെബ്സൈറ്റിലൂടെടെയാണ് ദാറുൽ ഉലൂം വിശുദ്ധ യുദ്ധത്തിന് ആഹ്വാനം ചെയ്തിരിക്കുന്നത്. ഇസ്ലാമിക വിശ്വാസ പ്രകാരം ഇത് അനുവദനീയമാണെന്നും ഫത്വ പറയുന്നുണ്ട്.
ഫത്വ കുട്ടികളെ സ്വന്തം രാജ്യത്തെ വെറുക്കാൻ പ്രരിപ്പിക്കുന്നതാണെന്നും ഭാവിയിൽ മാനസിക ശാരീരിക ദുരവസ്ഥയിലേക്ക് നയിക്കുമെന്നും ബാലാവകാശ കമ്മീഷൻ അയച്ച കത്ത് വ്യക്തമാക്കുന്നു. ഇത് ജുവനൈൽ ആക്ടിന്റെ സെക്ഷൻ 75-ന്റെ ലംഘനമാണെന്ന് കമ്മീഷൻ ചെയർമാൻ പ്രിയങ്ക് കനൂങ്കോ പറഞ്ഞു.
നിർദ്ദേശത്തെ തുടർന്ന് സഹാറൻപൂർ ജില്ലാ കളക്ടർ സബ് ഡിവിഷണൽ മജിസ്രേറ്റിനോട് ആവശ്യമായ നടപടി സ്വീകരിക്കാൻ ആവശ്യപ്പെട്ടു. നിർദ്ദേശം ലഭിച്ചിട്ടുണ്ടെന്നും ഇത് സംബന്ധിച്ച് സീനിയർ പോലീസ് സൂപ്രണ്ടിന് കത്തയച്ചിട്ടുണ്ടെന്നും ജില്ലാ കളക്ടർ പറഞ്ഞു. പിന്നാലെ എസ്ഡിഎമ്മും സംഘവും സ്ഥലം സന്ദർശിച്ചു.