ഹൈസ്‌കൂളിൽ പഠിക്കുന്ന പെൺകുട്ടിയാണോ? ന്യൂനപക്ഷ വിഭാഗത്തിനായി കേന്ദ്രസർക്കാർ നൽകുന്ന ബീഗം ഹസ്രത്ത് മഹൽ സ്‌കോളർഷിപ്പിനെ കുറിച്ച് അറിയാം

ന്യൂനപക്ഷ വിഭാഗങ്ങളിലെ പെൺകുട്ടികൾക്കായി കേന്ദ്രസർക്കാർ നടപ്പിലാക്കുന്ന പദ്ധതിയാണ് ബീഗം ഹസ്രത്ത് മഹൽ സ്‌കോളർഷിപ്പ്. 9 മുതൽ 12 വരെ ക്ലാസ്സുകളിൽ പഠിക്കുന്ന വിദ്യാർത്ഥിനികൾക്ക് സ്‌കോളർഷിപ്പിന് അപേക്ഷിക്കാം…..

ആർക്കൊക്കെ അപേക്ഷിക്കാം…

മുസ്ലിം, ക്രിസ്ത്യൻ, ബുദ്ധിസ്റ്റ്, സിഖ്, പാർസി, ജെയിൻ സമുദായംഗം ആയിരിക്കണം. തൊട്ടുമുമ്പത്തെ പൊതുപരീക്ഷയിൽ 50 ശതമാനം മാർക്കോ തത്തുല്യ ഗ്രേഡോ ലഭിച്ചിരിക്കണം. അപേക്ഷാർത്ഥിയുടെ രക്ഷിതാക്കളുടെ വാർഷിക വരുമാനം 2 ലക്ഷം രൂപയിൽ കവിയരുത്.

ഒരേ ക്ലാസിലെ പഠനത്തിന് ഒരേ കുടുംബത്തിലെ പരമാവധി രണ്ടുപേർക്ക് സ്‌കോളർഷിപ്പ് ലഭിക്കും. അപേക്ഷാ ഫോറം സമർപ്പിക്കുന്നതിന് വിദ്യാർത്ഥികൾ ഒരു തരത്തിലുള്ള ഫീസും നൽകേണ്ടതില്ല

9, 10 ക്ലാസിലെ പഠനത്തിന് 5000 രൂപ വീതവും 11, 12 ക്ലാസിലെ പഠനത്തിന് 6000 രൂപ വീതവുമാണ് സ്‌കോളർഷിപ്പ്. അപേക്ഷ ഓൺലൈനായി www.maef.nic.in വഴി നൽകാം. വെബ്‌സൈറ്റ് വഴിയുള്ള സ്റ്റുഡന്റ് വെരിഫിക്കേഷൻ ഫോം ഡൗൺലോഡ് ചെയ്‌തെടുക്കണം. വിശദമായ മാർഗ്ഗനിർദേശം വെബ്‌സൈറ്റിൽ നൽകിയിട്ടുണ്ട്