ശ്രീനഗർ: ക്രിക്കറ്റ് ആരാധകരുടെ മനം കവർന്ന് ക്രിക്കറ്റ് ഇതിഹാസം സച്ചിൻ ടെൻഡുൽക്കറിന്റെ പുതിയ ഇൻസ്റ്റഗ്രാം പോസ്റ്റ്. ജമ്മു കശ്മീരിൽ നിന്നുള്ള പാരാ ക്രിക്കറ്റ് ടീം ക്യാപ്റ്റൻ ആമിർ ഹുസൈൻ ലോണിനെ കണ്ട വീഡിയോയാണ് ആരാധകരുടെ മനംകവർന്നത്. ആമിറും കുടുംബവുമായി സംസാരിച്ച സച്ചിൻ, തന്റെ കയ്യൊപ്പ് പതിഞ്ഞ ബാറ്റും പാരാ ക്രിക്കറ്റർക്ക് സമ്മാനിച്ചു. സച്ചിനും ആമിറുമായുള്ള കൂടിക്കാഴ്ചയുടെ വീഡിയോ വൈറലാണ്. യഥാർത്ഥ നായകൻ ആമിറിന്, നീ ഇനിയും പ്രചോദനമാകുക, നിന്നെ കണ്ടുമുട്ടിയതിൽ അതിയായ സന്തോഷം എന്ന അടിക്കുറിപ്പോടെയാണ് ക്രിക്കറ്റ് ഇതിഹാസം വീഡിയോ പങ്കുവച്ചിരിക്കുന്നത്.
34കാരനായ താരം ബിജ്‌ബെഹറയിലെ വാഘാമ സ്വദേശിയാണ്. 2013-ലാണ് ആമിർ പാരാ ക്രിക്കറ്റിലേക്ക് കടന്നുവന്നത്. എട്ട് വയസുള്ളപ്പോൾ മില്ലിൽവച്ചുണ്ടായ അപകടത്തിലാണ് താരത്തിന്റെ ഇരു കൈകളും നഷ്ടമായത്. 2013-ൽ ആമിർ പാരാ ക്രിക്കറ്റിലെ ദേശീയ മത്സരങ്ങൾ കളിച്ചുതുടങ്ങി. 2018 മുതൽ അന്താരാഷ്‌ട്ര മത്സരങ്ങളിലും അരങ്ങേറി. സച്ചിന്റെയും വിരാട് കോലിയുടെയും കടുത്ത ആരാധകനാണ് അമീർ. കാലുകൾ കൊണ്ട് മറ്റുള്ളവരെ അതിശയിപ്പിക്കുന്ന രീതിയിൽ പന്തെറിയുന്ന ആമിർ തോളും കഴുത്തും ഉപയോഗിച്ചാണ് ബാറ്റ് ചെയ്യുന്നത്.
View this post on Instagram
“>
ഇരുകൈകളുമില്ലാത്ത ആമിർ ബാറ്റ് ചെയ്യുന്ന വീഡിയോ സമൂഹമാദ്ധ്യമങ്ങളിൽ വൈറലായപ്പോൾ പ്രശംസയുമായി സച്ചിൻ രംഗത്തെത്തിയിരുന്നു. അസാധ്യമായത് ആമിർ സാധ്യമാക്കിയിരിക്കുന്നുവെന്നും കായികരംഗത്ത് അഭിനിവേശമുള്ള ആയിരങ്ങളെ ആമിർ പ്രചോദിപ്പിക്കും. ഒരിക്കൽ അമീറിനെ നേരിട്ട് കാണാനാകുമെന്നും അദ്ദേഹത്തിന്റെ പേര് പതിച്ച ജേഴ്സി വാങ്ങുമെന്നും സച്ചിൻ പറഞ്ഞിരുന്നു. ആ വാക്കാണ് ഇന്ന് യാഥാർത്ഥ്യമായത്.
