പൂനെ: യുഎസ് കോൺസുലേറ്റ്, മഹ്രത്ത ചേംബർ ഓഫ് കൊമേഴ്സ്, ഇൻഡസ്ട്രീസ് ആൻഡ് അഗ്രികൾച്ചർ (എംസിസിഐഎ) എന്നിവയുടെ സഹകരണത്തോടെ ആദ്യത്തെ യുഎസ്-ഇന്ത്യ സൈബർ സുരക്ഷാ സംരംഭം ആരംഭിച്ചു. ഇരു രാജ്യങ്ങളും തമ്മിലുള്ള ഐടി ബന്ധങ്ങൾ ശക്തിപ്പെടുത്തുന്നതിന്റെ ഭാഗമായാണ് നടപടി.
തൊഴിലവസരങ്ങൾ സൃഷ്ടിക്കുന്നതിനും ഐടിയുമായി ബന്ധപ്പെട്ട വിഷയങ്ങളിൽ അത്യാധുനിക പരിഹാരങ്ങൾ കണ്ടെത്തുന്നതിനും ആഗോളതലത്തിൽ മികച്ച സൈബർ സുരക്ഷാ വിദഗ്ധരെ ഒന്നിപ്പിക്കുകയാണ് സംരംഭത്തിന്റെ ലക്ഷ്യമെന്ന് യുഎസ് കോൺസൽ ജനറൽ മൈക്ക് ഹാങ്കി പറഞ്ഞു. എംസിസിഐഎ പൂനെ ബിസിനസ് ഇൻ്റർനാഷണൽ ബിസിനസ് ഉച്ചകോടിയിൽ സംസാരിക്കവേയാണ് അദ്ദേഹത്തിന്റെ പരാമർശം.
Reflecting the United States and India’s shared vision for a world that is open, secure, and prosperous, #CGHankey joined the launch of the U.S.-India Cybersecurity Initiative by @MCCIA_Pune. Together, we will foster robust IT connections bringing together the best cybersecurity… pic.twitter.com/a1rMj4dRqD
— U.S. Consulate Mumbai (@USAndMumbai) February 26, 2024
സൈബർ ഇടങ്ങളിൽ ജനങ്ങൾ തമ്മിലുള്ള ബന്ധം വളർത്തിയെടുക്കാനും സംരംഭം സഹായിക്കും. ഡിജിറ്റൽ സാങ്കേതിക വിദ്യകൾ മനുഷ്യ ചരിത്രത്തിലെ തന്നെ വേഗതയിലാണ് മുന്നേറുന്നത്. രാജ്യങ്ങൾ തമ്മിലുള്ള നയന്ത്ര ബന്ധവും ഡിജിറ്റൽ ലോകത്തും ദൃഢമാകണമെന്ന ആശയമാണ് ഇതിന് പിന്നിലെന്നും അദ്ദേഹം പറഞ്ഞു. പൊതു-സ്വകാര്യ മേഖലകളുടെ വികസനത്തിന് സുരക്ഷിതവും സുസ്ഥിരവുമായ സൈബർ ഇടം നിർണായകമാണെന്ന് ഹാങ്കി അഭിപ്രായപ്പെട്ടു.
യുഎസ് -ഇന്ത്യ ഉഭയകക്ഷി ബന്ധത്തിൽ സൈബർ പ്രശ്നങ്ങളെ വളരെ ഗൗരവമായി തന്നെയാണ് നോക്കി കാണുന്നത്. സൈബർ സുരക്ഷാ ഭീഷണികൾ എങ്ങനെ കുറയ്ക്കാമെന്നും ഡിജിറ്റൾ വിപ്ലവം ആഗോള അഭിവൃദ്ധിയും സ്ഥിരതയും പ്രോത്സാഹിപ്പിക്കുന്നത് എപ്രകാരമെന്നുമാണ് ഇരു രാജ്യങ്ങളും നോക്കി കാണുന്നത്. നിർമിത ബുദ്ധി അസാധാരണമായ പരിവർത്തനങ്ങൾക്കാണ് വിധേയമാകുന്നതെന്നും അദ്ദേഹം കൂട്ടിച്ചേർത്തു. ആർട്ടിഫിഷ്യൽ ഇൻ്റലിജൻസ്, ടെലികമ്മ്യൂണിക്കേഷൻസ്, നിർണായകമായ സാങ്കേതികവിദ്യകൾ, ബയോ എഞ്ചിനീയറിംഗ്, ഊർജം എന്നിവയിൽ അസാധാരണമായ പരിവർത്തനങ്ങൾ ലോകം നിരീക്ഷിക്കുകയാണെന്ന് ഉച്ചകോടിയിലെ ഹാങ്കി കൂട്ടിച്ചേർത്തു.