ചെന്നൈ: ഡിഎംകെ സർക്കാരിനെതിരെ രൂക്ഷ വിമർശനവുമായി ബിജെപി നേതാവ് സി.ആർ. കേശവൻ. പുതിയ ഇസ്രോ കേന്ദ്രം തമിഴ്നാട്ടിൽ സ്ഥാപിതമാകുന്നതുമായി ബന്ധപ്പെട്ട് സംസ്ഥാന സർക്കാർ പങ്കുവച്ച പത്രപരസ്യത്തിൽ ചൈനീസ് പതാക പ്രത്യക്ഷപ്പെട്ടതിലാണ് സി.ആർ. കേശവന്റെ വിമർശനം.
ഇസ്രോയുടെ രണ്ടാമത്തെ ബഹിരാകാശ കേന്ദ്രത്തിന്റെ തറക്കല്ലിടൽ ചടങ്ങായിരുന്നു ഇന്ന് പ്രധാനമന്ത്രി നടത്തിയ ഉദ്ഘാടനങ്ങളിൽ ഏറ്റവും പ്രധാനപ്പെട്ടത്. തമിഴ്നാട്ടിൽ എന്തെങ്കിലും നല്ല കാര്യങ്ങൾ സംഭവിക്കുമ്പോൾ, പ്രത്യേകിച്ച് കേന്ദ്രസർക്കാരാണ് അത് ചെയ്യുന്നതെങ്കിൽ ഡിഎംകെ അതിനെ എതിർക്കും.
ഇന്ന് അവർ ചെയ്തത് ലജ്ജാകരമല്ല, പൊറുക്കാനാവാത്തതാണ്. കേന്ദ്രം കൊണ്ടുവന്ന ഇസ്രോ പദ്ധതിയുടെ ക്രഡിറ്റ് സംസ്ഥാന ഫിഷറീസ് മന്ത്രി ഡിഎംകെ നേതൃത്വത്തിന് നൽകുകയാണ്. പത്രത്തിൽ അത്തരത്തിൽ വ്യാജ പരസ്യം നൽകുകയാണ്. ഇതിലെല്ലാം പ്രധാനമായത് ഇസ്രോ റോക്കറ്റിൽ അവർ ചൈനീസ് പതാക സ്ഥാപിച്ചു എന്നതാണ്. – സി.ആർ കേശവൻ പറഞ്ഞു.