പ്രമുഖ ശ്രീലങ്കൻ ബ്രാൻഡായ എലിഫന്റ് ഹൗസിനെ ഭാരതത്തിലെ മാർക്കറ്റുകളിൽ എത്തിക്കാൻ നീക്കവുമായി റിലയൻസ്. ശ്രീലങ്കയിലെ ഏറ്റവും വലിയ ലിസ്റ്റഡ് കമ്പനിയായ ജോൺ കീൽസ് ഹോൾഡിംഗ്സ് പിഎൽസിയുടെ അനുബന്ധ സ്ഥാപനമായ സിലോൺ കോൾഡ് സ്റ്റോഴ്സിന്റെ ഉടമസ്ഥതയിലുള്ള ബ്രാൻഡാണ് എലിഫന്റ് ഹൗസ്.
നിലവിൽ വിവിധ രാജ്യങ്ങളിലായി എലിഫന്റ് ഹൗസ് ബ്രാൻഡിന് കീഴിൽ, നെക്ടോ, ക്രീം സോഡ, ഇജിബി (ജിഞ്ചർ ബിയർ), ഓറഞ്ച് ബാർലി, ലെമനേഡ് എന്നിവയുൾപ്പെടെ നിരവധി പാനീയങ്ങൾ നിർമ്മിക്കുകയും വിൽക്കുകയും ചെയ്യുന്നു. ഈ ഉത്പന്നങ്ങൾ ഇന്ത്യയിലെ മാർക്കറ്റിലെത്തിക്കാനാണ് റിലയൻസ് തയ്യാറെടുക്കുന്നത്. ഇതു സംബന്ധിച്ച് കരാറിൽ ഒപ്പിട്ടതായി ഇരു സ്ഥാപനങ്ങളും അറിയിച്ചു.