ന്യൂഡൽഹി: വിദേശകാര്യ മന്ത്രി എസ്. ജയ്ശങ്കറുമായി കൂടിക്കാഴ്ച നടത്തി മൈക്രോസോഫ്റ്റ് സഹസ്ഥാപകൻ ബിൽ ഗേറ്റ്സ്. കൂടിക്കാഴ്ചയ്ക്കൊടുവിൽ ഇരുവരും എഴുതിയ പുസ്തകങ്ങൾ പരസ്പരം കൈമാറി.
ഇരുവരും പുസ്തകങ്ങളുമായി നിൽക്കുന്ന ചിത്രം എസ്. ജയ്ശങ്കർ പങ്കുവച്ചിട്ടുണ്ട്. സൗഹാർദപരമായ സംഭാഷണമായിരുന്നുവെന്നും ഇതിന് പുറമേ മികച്ച രചനകൾ കൈമാറാൻ സാധിച്ചു എന്നുള്ള സന്തോഷം പങ്കുവച്ചാണ് ജയ്ശങ്കർ എക്സിൽ ചിത്രം പങ്കിട്ടത്. എസ് ജയ്ശങ്കറിന്റെ ‘വൈ ഇന്ത്യ മാറ്റേഴ്സ്’ (Why India Matters), ബിൽ ഗേറ്റ്സിന്റെ ‘ഹൗ ടു പ്രിവെന്റ് ദ നെക്സ്റ്റ് പാൻഡെമിക്’ (How to prevent the next pandemic) എന്ന പുസ്തങ്ങളാണ് ഇരുവരും കൈമാറിയത്.
A good book exchange with @BillGates.
And a great conversation. pic.twitter.com/6kfBEv84M7
— Dr. S. Jaishankar (@DrSJaishankar) February 29, 2024
ഇന്ത്യൻ സന്ദർശനത്തിനെത്തിയ വേളയിലാണ് വിദേശകാര്യമന്ത്രിയുമായി അദ്ദേഹം കൂടിക്കാഴ്ച നടത്തിയത്. കഴിഞ്ഞ ദിവസം കേന്ദ്ര ആരോഗ്യമന്ത്രി മൻസുഖ് മാണ്ഡവ്യയുമായും ബിൽ ഗേറ്റ്സ് കൂടിക്കാഴ്ച നടത്തിയിരുന്നു. നിരവധി സുപ്രധാന മേഖലകളിലാണ് ഭാരതം പുരോഗതി കൈവരിച്ചതെന്ന് അദ്ദേഹം പറഞ്ഞിരുന്നു. ലോകത്തിന് ഇന്ത്യ നൽകുന്ന സംഭാവനകൾ വിലമതിക്കാനാവത്തതാണ്. ഇന്ത്യയുടെ വളർച്ചയിൽ ഏറെ പ്രതീക്ഷയുണ്ടെന്നും അദ്ദേഹം കൂട്ടിച്ചേർത്തു.
ഡിജിറ്റൽ പബ്ലിക് ഇൻഫ്രാസ്ട്രക്ചർ അവതരിപ്പിക്കുന്നതിലും രാജ്യത്തിന്റെ ഗ്രാമീണ സമ്പദ്വ്യവസ്ഥയെ പരിവർത്തനം ചെയ്യുന്നതിലും പ്രധാനമന്ത്രി നരേന്ദ്ര മോദിയുടെ നേതൃത്വത്തെയും ബിൽ ഗേറ്റ്സ് അഭിനന്ദിച്ചു. ഇന്ത്യയുടെ നേതൃപാഠവം മറ്റ് രാജ്യങ്ങൾക്ക് പ്രചോദനം നൽകുമെന്നും അദ്ദേഹം പറഞ്ഞു.