മുംബെെ: നടൻ ശരത് കുമാറിന്റെ മകളും നടിയുമായ വരലക്ഷ്മി ശരത്കുമാറിന്റെ വിവാഹനിശ്ചയം കഴിഞ്ഞു. ആർട്ട് ഗാലറി ഉടമ നിക്കോളായ് സച്ച്ദേവ് ആണ് പ്രതിശ്രുത വരൻ. വെള്ളിയാഴ്ച വൈകുന്നേരം മുംബൈയിൽ വച്ചായിരുന്നു വിവാഹനിശ്ചയം നടന്നത്. അടുത്ത ബന്ധുക്കളും സുഹൃത്തുക്കളും മാത്രമായിരുന്നു ചടങ്ങിൽ പങ്കെടുത്തത്.
ശരത് കുമാറിന്റെ ഭാര്യ രാധിക ശരത് കുമാറാണ് വിവാഹനിശ്ചയത്തിന്റെ ചിത്രങ്ങൾ സമൂഹമാദ്ധ്യമത്തിലൂടെ പങ്കുവച്ചത്. ഈ വർഷം അവസാനത്തിലായിരിക്കും ഇരുവരുടെയും വിവാഹം. ഇരുവരുടെയും 14 വർഷത്തെ സൗഹൃദമാണ് വിവാഹത്തിലെത്തി നിൽക്കുന്നത്. താരങ്ങൾ ഉൾപ്പടെ നിരവധിയാളുകളാണ് വരലക്ഷ്മിക്കും നിക്കോളയ്‌ക്കും ആശംസകളുമായി എത്തുന്നത്.
നടൻ ശരത്കുമാറിന്റെ ആദ്യ ഭാര്യ ഛായയിലെ മകളാണ് വരലക്ഷ്മി. ഈ ദമ്പതിമാര്‍ക്ക് വരലക്ഷ്മിക്ക് പുറമേ പൂജ എന്ന മകൾ കൂടിയുണ്ട്.
