ഗുജറാത്ത് ടൈറ്റൻസ് താരം റോബിൻ മിൻസിന് വാഹനാപകടത്തിൽ പരിക്ക്. ബൈക്കപകടത്തിൽ മകന് പരിക്ക് പറ്റിയ കാര്യം പിതാവ് ഫ്രാൻസിസാണ് ആരാധകരെ അറിയിച്ചത്. ഝാർഖണ്ഡ് സ്വദേശിയായ താരം ബാറ്റിംഗിൽ വെടിക്കെട്ട് പ്രകടനമാണ് കാഴ്ചവയ്‌ക്കുന്നത്. ഐപിഎല്ലിൽ 3.60 കോടി രൂപയ്‌ക്കാണ് താരത്തെ ഗുജറാത്ത് ടൈറ്റൻസ് സ്വന്തമാക്കിയത്.
കവാസാക്കിയുടെ സൂപ്പർ ബൈക്ക് ഓടിക്കുന്നതിനിടെയാണ് താരത്തിന് അപകടമുണ്ടായത്. നിയന്ത്രണം വിട്ട ബൈക്ക് മറ്റൊരു വാഹനവുമായി കൂട്ടിയിടിക്കുകയായിരുന്നു. അപകടത്തിൽ ബൈക്കിന് കേടുപാടുകൾ സംഭവിച്ചിട്ടുണ്ട്. ആശുപത്രിയിൽ ചികിത്സയിൽ തുടരുന്ന താരത്തിന്റെ പരിക്ക് ഗുരുതരമല്ല. താരത്തിന്റെ വലത് കാൽമുട്ടിന് പരിക്കുണ്ടെന്നും പിതാവ് പറഞ്ഞു.
രഞ്ജി ട്രോഫിയിൽ ഇതുവരെയും പങ്കെടുക്കാത്ത താരം ത്സാർഖണ്ഡ് അണ്ടർ 19, അണ്ടർ 25 ടീമുകളുടെ ഭാഗമാണ്. ഇന്ത്യൻ മുൻ താരം എം.എസ് ധോണിയുടെ കടുത്ത ആരാധകൻ കൂടിയാണ് മിൻസ്.
