പൃഥ്വിരാജിന്റെ സിനിമകളിൽ എല്ലാവരും കാണണമെന്ന് ആഗ്രഹമുള്ള സിനിമ ആടുജീവിതമാണെന്ന് മല്ലിക സുകുമാരൻ. ആടുജീവിതത്തിന് വേണ്ടി ഭഗവാനോട് പ്രാർത്ഥിക്കുമെന്നും നടി പറഞ്ഞു. ആടു ജീവിതത്തിന് വേണ്ടി പൃഥ്വിരാജ് മെലിഞ്ഞത് കണ്ടപ്പോൾ ശരീരം കുറച്ചതാണോ, മരുഭൂമിയിൽ കിടന്ന് എന്തെങ്കിലും അസുഖം പിടിച്ചതാണോയെന്ന സംശയം തനിക്കുണ്ടായെന്നും താരം പറഞ്ഞു. ഒരു ഓൺലൈൻ മാദ്ധ്യമത്തിന് നൽകിയ അഭിമുഖത്തിലായിരുന്നു ഇക്കാര്യങ്ങൾ പറഞ്ഞത്.
‘പൃഥ്വിരാജും ഇന്ദ്രജിത്തും തമ്മിൽ എല്ലാ കാര്യങ്ങളും പറയും. ആടുജീവിതത്തിന് വേണ്ടി ഭഗവാനെ തൊഴുത് ഞാൻ പ്രാർത്ഥിക്കും. ആടുജീവിതത്തിന് വേണ്ടി ഇത്രയും മെലിഞ്ഞത് കുറെ ദിവസം കഴിഞ്ഞിട്ടാണ് ഞാൻ അറിഞ്ഞത്. ഞാൻ ഇത്രയും മെലിഞ്ഞത് അമ്മ അറിയരുതെന്നായിരുന്നു എല്ലാവരോടുമുള്ള പൃഥ്വിയുടെ നിർദ്ദേശം. ഞാൻ കുറെയേറെ കാലം കഴിഞ്ഞിട്ടാണ് ഇക്കാര്യം അറിഞ്ഞത്.
ഡോക്ടർമാർ ഇത്രയും മെലിയരുതെന്ന് പറഞ്ഞത് കേൾക്കാതെയാണ് അവൻ മെലിഞ്ഞത്. അസ്ഥിപോലെയായി അവസാനം പൃഥ്വി. ഇനി ഇത്രയും മെലിഞ്ഞ് അഭിനയിക്കില്ലെന്ന് അവസാനം അവനും പറഞ്ഞു. അവന്റെ ഫോട്ടോയൊക്കെ കണ്ടപ്പോൾ ശരീരം കുറച്ചതാണോ, മരുഭൂമിയിൽ കിടന്ന് എന്തെങ്കിലും അസുഖം പിടിച്ചതാണോയെന്നും എനിക്ക് സംശയം തോന്നി.
ഞാൻ കൂടെക്കൂടെ അവരുടെ കൂടെ പോയ ആൾക്കാരോട് ചോദിക്കുന്നുണ്ട്. അവർ ഒന്നുമില്ല ചേട്ടൻ ഇവിടെ ഷൂട്ട് ചെയ്തുകൊണ്ടിരിക്കുന്നു എന്നാണ് പറയുന്നത്. ആഹാരം കഴിക്കുന്നില്ലേ എന്ന് ചോദിക്കുമ്പോൾ കുറച്ചു വണ്ണം കുറക്കണം എന്നാണ് അവരുടെ മറുപടി. ഇതൊക്കെ ട്രെയിൻ ചെയ്ത് ഏൽപ്പിച്ചിട്ടുണ്ട്. ‘അമ്മ വിളിച്ചാൽ ഇങ്ങനെ പറയണം, കഷ്ടകാലത്തിന് അമ്മ അറിഞ്ഞാൽ നാളത്തെ ഫ്ലൈറ്റിന് ജോർദാനിൽ വരും’ ഇതൊക്കെയാണ് പൃഥ്വി അവരോട് പറയുക. എല്ലാവരും കാണണമെന്ന് ഞാൻ ആഗ്രഹിക്കുന്ന പൃഥ്വിയുടെ സിനിമ ആടുജീവിതമാണ്.’- മല്ലിക സുകുമാരൻ പറഞ്ഞു .
