അനന്ത് അംബാനിയുടെയും മകള് രാധിക മര്ച്ചന്റിന്റെയും വിവാഹത്തിന് മുന്നോടിയായുള്ള ആഘോഷ പരിപാടികളാണ് കഴിഞ്ഞ കുറച്ച് ദിവസങ്ങളിലായി സമൂഹമാദ്ധ്യമങ്ങളിൽ ഇടംപിടിക്കുന്നത്.
മൂന്ന് ദിവസം നീണ്ടുനിന്ന പരിപാടിയിൽ പങ്കെടുക്കാൻ ബോളിവുഡ് സിനിമാ ലോകം ഒന്നടങ്കമാണ് ഗുജറാത്തിലെ ജാംനഗറിലെത്തിയത്. ആഘോഷങ്ങളുടെ ചിത്രങ്ങൾ സമൂഹമാദ്ധ്യമങ്ങളിൽ വൻ തോതിൽ പ്രചരിക്കുകയാണ്.
മൂന്ന് ദിവസത്തെ വ്യത്യസ്ത ചടങ്ങുകൾക്കായി 1,260 കോടിയാണ് അംബാനി കുടുംബം ചെലവഴിച്ചത്. വിവാഹത്തിന് മുമ്പുള്ള ആഘോഷ പരിപാടികൾക്ക് മാർച്ച് ഒന്നിനായിരുന്നു തുടക്കം.
ബോളിവുഡ് ഡിസൈനർ മനീഷ് മൽഹോത്രയാണ് അംബാനി കുടുംബത്തിന്റെ വസ്ത്രം ഡിസൈൻ ചെയ്തത്. മനീഷ് പ്രത്യേകം ഡിസൈന് ചെയ്ത വസ്ത്രങ്ങളാണ് അനന്ത് അംബാനിയും-രാധിക മെര്ച്ചന്റും മൂന്ന് ദിവസങ്ങളിലും ധരിച്ചിരുന്നത്.
അംബാനി കുടുംബത്തിന്റെ ജാംനഗറിലുള്ള റിഫൈനറി ടൗണ്ഷിപ്പിലാണ് ആഘോഷ പരിപാടികള് നടന്നത്. ബന്ധുക്കളെയും സുഹൃത്തുക്കളെയും കൂടാതെ വ്യാവസായിക സിനിമാ മേഖലകളിലെ നിരവധി പ്രമുഖരും പരിപാടിയിൽ പങ്കെടുത്തിരുന്നു. കഴിഞ്ഞ മൂന്ന് ദിവസമായ നടന്ന താരനിബിഡമായ ആഘോഷ പരിപാടികൾക്ക് സമൂഹമാദ്ധ്യമലോകവും സാക്ഷ്യം വഹിച്ചു.
പോപ് ഗായിക റിഹാനയുടെ ഗാനങ്ങളായിരുന്നു പരിപാടിയുടെ ആദ്യ ദിവസത്തെ പ്രധാന ആകർഷണം. രണ്ടാം ദിനത്തിൽ ബോളിവുഡിലെ താരങ്ങളുടെ മനോഹര നൃത്ത പ്രകടനങ്ങളും മറ്റും ആഘോഷങ്ങളുടെ മാറ്റ് കൂട്ടി.
അവസാന ദിവസമായ ഇന്നലെ മുകേഷ് അംബാനി- നിതാ അംബാനി ദമ്പതികളുടെ നൃത്തം അതിഥികളുടെ ശ്രദ്ധയാകർഷിക്കുകയും സമൂഹമാദ്ധ്യമങ്ങളിൽ വൈറലാകുകയും ചെയ്തു.
