മുംബൈ: കോൺഗ്രസ് നേതാവ് രാഹുലിനെ വെല്ലുവിളിച്ച് കേന്ദ്രമന്ത്രി സ്മൃതി ഇറാനി. രാഹുലിന് ധൈര്യമുണ്ടെങ്കിൽ 10 വർഷത്തെ യുപിഎ ഭരണവും നരേന്ദ്രമോദി സർക്കാരിന്റെ ഭരണവും തമ്മിലുള്ള വ്യത്യാസം ചർച്ച ചെയ്യണമെന്ന് സ്മൃതി ആവശ്യപ്പെട്ടു. നാഗ്പൂരിൽ ഭാരതീയ ജനതാ യുവമോർച്ച സംഘടിപ്പിച്ച സമ്മേളനത്തിൽ സംസാരിക്കുകയായിരുന്നു കേന്ദ്രമന്ത്രി.
” എന്റെ ശബ്ദം രാഹുലിലേക്ക് എത്തുകയാണെങ്കിൽ തുറന്ന ചെവിയോടെ ഇത് കേൾക്കണം. നിങ്ങളുടെ ഭരണകാലത്തെ 10 വർഷവും മോദി സർക്കാരിന്റെ ഭരണ സമയത്തെ 10 വർഷവും തമ്മിലുള്ള വ്യത്യാസം ചർച്ച ചെയ്യാൻ നിങ്ങൾക്ക് സാധിക്കുമോ? എനിക്ക് ഉറപ്പുണ്ട് നിങ്ങൾക്കത് ചർച്ച ചെയ്യാനുള്ള ശക്തിയുണ്ടാവില്ല. കാരണം പ്രധാനമന്ത്രി ജനങ്ങൾക്ക് നൽകിയ വാഗ്ദാനങ്ങൾ നിറവേറ്റുന്ന വ്യക്തിയാണ്. നിങ്ങൾക്ക് അതിന് സാധിച്ചിട്ടുണ്ടോ? യുവമോർച്ചയുടെ ഒരു സാധാരണ പ്രവർത്തകൻ സംസാരിച്ചാൽ പോലും രാഹുലിന് പിടിച്ചു നിൽക്കാൻ സാധിക്കില്ലെന്ന് എനിക്ക് ഉറപ്പുണ്ട്.”-സ്മൃതി ഇറാനി പറഞ്ഞു.
കഴിഞ്ഞ 10 വർഷം രാജ്യത്ത് മോദി സർക്കാർ അദ്ദേഹത്തിന്റെ മികച്ച ഭരണം കാഴ്ചവച്ചു. ഈ 10 വർഷത്തിനിടയിൽ അദ്ദേഹം ജനങ്ങൾക്ക് നൽകിയ ഉറപ്പുകൾ പാലിക്കാൻ അദ്ദേഹം അഹോരാത്രം ശ്രമിച്ചിരുന്നു. അങ്ങനെ 10 വർഷത്തിനുള്ളിൽ പാർട്ടി പ്രകടനപത്രികയിൽ ജനങ്ങൾക്ക് നൽകിയ മൂന്ന് പ്രധാന വാഗ്ദാനങ്ങളാണ് കേന്ദ്രസർക്കാർ പ്രധാനമന്ത്രിയുടെ നേതൃത്വത്തിൽ നിറവേറ്റിയതെന്നും സ്മൃതി പറഞ്ഞു. ജമ്മു കശ്മീരിന്റെ പ്രത്യേക പദവിയായ ആർട്ടിക്കിൾ 370 എടുത്ത് കളഞ്ഞതതും രാമക്ഷേത്രം നിർമ്മാണം, നിയമസഭയിലെ വനിതാ സംവരണം എന്നിവ അത്തരത്തിൽ പ്രധാനമന്ത്രി നിറവേറ്റിയ വാഗ്ദാനങ്ങളാണെന്നും സമൃതി ഇറാനി വ്യക്തമാക്കി.