ന്യൂഡൽഹി: പാകിസ്താൻ പ്രധാനമന്ത്രിയായി ചുമതലയേറ്റ ഷെഹ്ബാസ് ഷരീഫിന് ആശംസകൾ അറിയിച്ച് പ്രധാനമന്ത്രി നരേന്ദ്രമോദി. സമൂഹമാദ്ധ്യമമായ എക്സിലൂടെയാണ് പ്രധാനമന്ത്രി അഭിനന്ദനങ്ങൾ അറിയിച്ച് രംഗത്തെത്തിയത്. രാഷ്ട്രീയ-സാമ്പത്തിക പ്രതിസന്ധിയിലൂടെ കടന്നുപോകുന്ന പാകിസ്താന്റെ പുതിയ പ്രധാനമന്ത്രിയായി ഇക്കഴിഞ്ഞ 3-ാം തീയതിയാണ് ഷെഹ്ബാസ് ചുമതലയേറ്റത്.
സാമ്പത്തിക പ്രതിസന്ധിയിൽ ആടിയുലയുന്ന പാകിസ്താനിൽ 201 വോട്ടുകളോടെയാണ് ഷരീഫ് ചുമതലയേറ്റത്. പാകിസ്താൻ മുസ്ലീം ലീഗ് വിഭാഗം, പാകിസ്താൻ പീപ്പിൾസ് പാർട്ടി എന്നിവരുടെ പിന്തുണയോടെയാണ് ഷെഹ്ബാസ് ഷരീഫ് വിജയിച്ചത്. പാകിസ്താൻ തെഹ്രീകെ ഇൻസാഫ് പാർട്ടിയുടെ പിന്തുണയോടെ സുന്നി ഇത്തിഹാദ് കൗൺസിൽ ചെയർമാൻ സാഹിബ്സാദ ഹമീസ് റാസ നാമനിർദ്ദേശം ചെയ്ത് ഒമർ അയൂബ് ഖാനായിരുന്നു ഷെഹ്ബാസ് ഷെരീഫിന്റെ എതിരാളി.