ന്യൂഡല്ഹി: ബഹുനില കെട്ടിടം തകര്ന്നുവീണ് നിരവധി പേര് കുടുങ്ങി. ഡല്ഹിയിലെ സത്യനികേതനില് ഞായറാഴ്ച ഉച്ചയ്ക്ക് ഒന്നരയോടെയായിരുന്നു സംഭവം. അഗ്നിരക്ഷാസേന, പോലീസ്, ദുരന്ത നിവാരണ അതോറിറ്റി തുടങ്ങി വിവിധ ഏജന്സികളുടെ നേതൃത്വത്തില് രക്ഷാപ്രവര്ത്തനം പുരോഗമിക്കുകയാണ്. കെട്ടിടാവശിഷ്ടങ്ങള്ക്കിടയില് കുടുങ്ങിക്കിടന്നിരുന്ന എട്ടുപേരെ രക്ഷപ്പെടുത്തി. പരിക്കേറ്റവരെ ഡല്ഹി എയിംസ് ആശുപത്രിയിലേക്ക് കൊണ്ടുപോയി. മൂന്നുപേരുടെ നില ഗുരുതരമാണെന്നാണ് വിവരം.
ഡല്ഹി സര്വകലാശാലയുടെ സൗത്ത് ക്യാമ്പസിന് സമീപമാണ് കെട്ടിടം സ്ഥിതി ചെയ്യുന്നത്. പുരുഷന്മാര്ക്കായുള്ള പെയിങ് ഗസ്റ്റ് (പിജി) സംവിധാനമാണ് കെട്ടിടത്തില് പ്രവര്ത്തിച്ചിരുന്നത്. സര്വകലാശാലയ്ക്ക് സമീപമായതിനാല് കോളേജ് വിദ്യാര്ഥികളാണ് ഇവിടെ താമസിച്ചിരുന്നത്. എന്എസ്യുഐ, ഐസ തുടങ്ങിയ വിദ്യാര്ഥിസംഘടനകളും രക്ഷാപ്രവര്ത്തനത്തില് സഹായിക്കാനായി സ്ഥലത്തെത്തിയിട്ടുണ്ട്.
ഫയര്ഫോഴ്സിനും പോലീസിനും പുറമെ വേറേയും വിവിധധ ഏജന്സികളെ രക്ഷാപ്രവര്ത്തനത്തിനായി അയച്ചിട്ടുണ്ടെന്ന് ഡല്ഹി മുഖ്യമന്ത്രി രേഖാ ഗുപ്ത പറഞ്ഞു. ഡല്ഹി ദുരന്ത നിവാരണ അതോറിറ്റി (ഡിഡിഎംഎ), ദേശീയ ദുരന്ത പ്രതികരണ സേന (എന്ഡിആര്എഫ്), സെന്ട്രലൈസ്ഡ് ആക്സിഡന്റ് ആന്ഡ് ട്രോമാ സര്വീസസ് (സിഎടിഎസ്), സിവില് ഡിഫന്സ്, ഡല്ഹി മുന്സിപ്പല് കോര്പ്പറേഷന് അധികൃതര് തുടങ്ങിയവരെല്ലാം യുദ്ധകാലാടിസ്ഥാനത്തില് രക്ഷാപ്രവര്ത്തനം നടത്തുകയാണെന്ന് രേഖാ ഗുപ്ത എക്സിലൂടെ അറിയിച്ചു. മുന്കരുതലെന്ന നിലയില് സമീപത്തെ കെട്ടിടങ്ങള് ഒഴിപ്പിച്ചിട്ടുണ്ടെന്നും അവര് അറിയിച്ചു.
