സ്ഥിരമായി ട്രോളുകളിൽ നിറയുന്ന സൂപ്പർസ്റ്റാറാണ് നന്ദമുരി ബാലകൃഷ്ണ. ഓൺസ്ക്രീനിലായാലും ഓഫ്സ്ക്രീനിലായാലും ബാലയ്യയുടെ പ്രകടനങ്ങൾ ചർച്ച ചെയ്യാപ്പെടാറുണ്ട്. നിസാര കാര്യങ്ങൾക്ക് പോലും ദേഷ്യം പ്രകടിപ്പിക്കുന്ന താരമാണ് അദ്ദേഹം. സഹപ്രവർത്തകരോടും അവതാരകരോടും ആരാധകരോടുമെല്ലാം താരത്തിന്റെ ഭാഗത്ത് നിന്നുള്ള പെരുമാറ്റങ്ങൾ ചിരി പടർത്താറുണ്ട്. ഇപ്പോൾ ബാലയ്യയുടെ കോപത്തെ കുറിച്ച് സംസാരിക്കുകയാണ് സംവിധായകനും നടനുമായ കെ.എസ് രവികുമാർ.
ഷൂട്ടിംഗ് സെറ്റിൽ വച്ചുണ്ടായ സംഭവം ഓർത്തെടുത്തു കൊണ്ടാണ് നന്ദമുരി ബാലകൃഷ്ണയുടെ കോപത്തെപ്പറ്റി കെ.എസ് രവികുമാർ വെളിപ്പെടുത്തിയിരിക്കുന്നത്. വേദിയിൽ വച്ച് രവികുമാർ ബാലകൃഷ്ണയെ അനുകരിക്കുകയും ചെയ്തു. ബാലകൃഷ്ണയെ നോക്കി അറിയാതെ പോലും ചിരിക്കരുതെന്നും ചിരിച്ചാൽ അത് തന്നെ പരിഹസിക്കുന്നതാണെന്ന് അദ്ദേഹം ചിന്തിക്കുമെന്നും രവി കുമാർ പറഞ്ഞു. ഷൂട്ടിംഗിനിടെ തലയിൽ നിന്നും വിഗ് മാറിയ പോയ സംഭവം ഓർത്തെടുത്താണ് അദ്ദേഹം ഇക്കാര്യം വിശദീകരിച്ചത്.
ഒരിക്കൽ ഷൂട്ട് നടക്കവെ അസിസ്റ്റൻറ് ഡയറക്ടറായ ശരവണനോട് തനിക്ക് നേരെ ഫാൻ തിരിച്ചു വെക്കാൻ ബാലകൃഷ്ണ ആവശ്യപ്പെട്ടു. അദ്ദേഹം അത് അനുസരിച്ചു. ബാലകൃഷ്ണയുടെ നിർദ്ദേശ പ്രകാരം ഫാൻ തിരിച്ച് വച്ചു. എന്നാൽ ഫാനിൽ നിന്നുള്ള കാറ്റ് കൊണ്ട് ബാലയ്യയുടെ വിഗ് അല്പം തെന്നിമാറി. ഇത് കണ്ട് ശരവണൻ ചിരിച്ചു. ഇതോടെ ബാലയ്യക്ക് ദേഷ്യം വന്നു. നീ എന്തിനാണ് ചിരിക്കുന്നതെന്നും നീ മറ്റേ ഗ്യാംഗ് അല്ലേ എന്നും ചോദിച്ച് അദ്ദേഹത്തോട് കയർത്തു. സെറ്റിന് പുറത്തു പോകാൻ ശരവണിനോട് ആവശ്യപ്പെടുകയും ചെയ്തു- രവി കുമാർ പറഞ്ഞു.