കൊച്ചി: ശിവരാത്രിയോടനുബന്ധിച്ച് ഇന്ന് വൈകുന്നേരം നാല് മുതൽ നാളെ ഉച്ച കഴിഞ്ഞ് രണ്ട് വരെ ആലുവ നഗരത്തിലും പരിസരത്തും ഗതാഗത നിയന്ത്രണവും സുരക്ഷാ ക്രമീകരണങ്ങളും തുടരും. മണപ്പുറത്തേക്ക് എത്തുന്ന കെഎസ്ആർടിസി ബസുകൾ ഉൾപ്പെടെ എല്ലാ വാഹനങ്ങളും സെമിനാരിപ്പടിയിൽ നിന്ന് ജിസിഡിഎ റോഡിലൂടെ മണപ്പുറത്തേക്ക് പോകണം. ഇവിടെ കെഎസ്ആർടിസി ബസുകൾക്കും സ്വകാര്യ വാഹനങ്ങൾക്കും പ്രത്യേക പാർക്കിംഗ് സംവിധാനമാണ് സജ്ജമാക്കിയിരിക്കുന്നത്.
മണപ്പുറത്ത് നിന്ന് തിരികെ പോകുന്ന വാഹനങ്ങൾ ഓൾഡ് ദേശം റോഡ് വഴി പറവൂർ കവലയിൽ എത്തി പോകണം. കൂടാതെ തോട്ടയ്‌ക്കാട്ടുകര ജംഗ്ഷനിൽ നിന്ന് മണപ്പുറത്തേക്ക് വാഹന ഗതാഗതം അനുവദിക്കില്ലെന്ന് അധികൃതർ അറിയിച്ചു. വരാപ്പുഴ, എടയാർ ഭാഗങ്ങളിൽ നിന്നുള്ള ബസുകൾ തോട്ടയ്‌ക്കാട്ടുകര കവലയിൽ യാത്രക്കാരെ ഇറക്കിയ ശേഷം കടുങ്ങല്ലൂർ വഴി വേണം തിരികെ പോകാൻ.
അങ്കമാലി ഭാഗത്ത് നിന്നും എത്തുന്ന സ്വകാര്യ ബസുകൾ പറവൂർ കവലയിൽ യാത്രക്കാരെ ഇറക്കി യുടേൺ എടുത്ത് മടങ്ങണം. എറണാകുളം ഭാഗത്ത് നിന്ന് ദേശീയ പാതയിലൂടെ ആലുവയിലേക്ക് എത്തുന്ന സ്വകാര്യ ബസുകൾ പുളിഞ്ചോട് നിന്ന് വലത്തോട്ട് തിരിഞ്ഞ് കാരോത്തുകുഴിയിലൂടെ മുനിസിപ്പൽ സ്റ്റാൻഡിലെത്തി ആളെ ഇറക്കണം. തുടർന്ന് ബാങ്ക് ജംഗ്ഷൻ-ബൈപ്പാസ് വഴി എറണാകുളത്തേക്ക് മടങ്ങണം. പെരുമ്പാവൂർ ഭാഗത്ത് നിന്നും എത്തുന്ന കെഎസ്ആർടിസി ബസുകൾ പമ്പ് കവല വഴി മഹാത്മാഗാന്ധി ടൗൺ ഹാളിന് മുന്നിലെ താത്കാലിക സ്റ്റാൻഡിലെത്തിയ ശേഷം ഇവിടെ നിന്നും മടങ്ങണം.
രാത്രി എട്ട് മണിക്ക് ശേഷം പാലസ് റോഡിൽ ബാങ്ക് കവല മുതൽ മഹാത്മാഗാന്ധി ടൗൺ ഹാൾ വരെ ഗതാഗതം അനുവദിക്കില്ല. രാത്രി പത്ത് മുതൽ രാവിലെ പത്ത് വരെ തൃശൂർ ഭാഗത്ത് നിന്നും എത്തുന്ന ഹെവി വാഹനങ്ങൾ അങ്കമാലിയിൽ നിന്നും തിരിഞ്ഞ് എംസി റോഡിലൂടെ പോകണം. എറണാകുളത്ത് നിന്നും എത്തുന്ന ഹെവി വാഹനങ്ങൾ കളമശേരിയിൽ നിന്നും കണ്ടെയ്‌നർ റോഡിലൂടെ പറവൂരിലെത്തി മാഞ്ഞാലി റോഡ് കടന്ന് അത്താണി ജംഗ്ഷനിലൂടെ തൃശൂർ ഭാഗത്തേക്ക് പോകണം. ദേശീയപാതയുടെ ഇരുവശത്തും വാഹന പാർക്കിംഗ് നിരോധിച്ചിട്ടുണ്ട്.
