ധനുഷ് നായകനാകുന്ന 51-മത്തെ ചിത്രത്തിന്റെ ടൈറ്റിൽ പ്രഖ്യാപിച്ചു. കുബേര എന്ന് പേരിട്ടിരിക്കുന്ന ചിത്രത്തിന്റെ മോഷൻ പോസ്റ്ററും അണിയറ പ്രവർത്തകർ പുറത്തുവിട്ടു. ശേഖർ കമ്മൂല സംവിധാനം ചെയ്യുന്ന ചിത്രത്തിൽ രശ്മിക മന്ദാനയാണ് നായിക. തെലുങ്ക് സൂപ്പർസ്റ്റാർ നാഗാർജ്ജുനയും ചിത്രത്തിൽ പ്രധാനവേഷത്തിൽ എത്തുന്നുണ്ട്.
യാചകന്റെ വേഷത്തിലാണ് ചിത്രത്തിൽ ധനുഷ് എത്തുന്നത്.തമിഴ്, തെലുങ്ക്, കന്നട, ഹിന്ദി, മലയാളം എന്നീ ഭാഷകളിലാണ് ചിത്രം പ്രദർശനത്തിനെത്തുന്നത്. ഡ്രീംസ് എന്റർടെയ്ൻമെന്റ് യുകെയാണ് ചിത്രം വിതരണം ചെയ്യുന്നത്. ബിഗ് ബജറ്റിൽ ഒരുങ്ങുന്ന ചിത്രം ശ്രീ വെങ്കിടേശ്വര സിനിമാസിന്റെയും അമിഗോസ് ക്രിയേഷൻസിന്റെയും ബാനറിൽ നാരായൺ ദാസ് കെ നാരംഗ്, സുനിൽ നാരംഗ്, പുസ്‌കൂർ റാം മോഹൻ റാവു എന്നിവർ ചേർന്നാണ് നിർമ്മിക്കുന്നത്.
ഹാപ്പി ഡെയ്സ്, ലൗ സ്റ്റോറി, ഫിദ തുടങ്ങിയ ചിത്രങ്ങൾ സംവിധാനം ചെയ്ത ശേഖർ കമ്മൂലയുടെ ആദ്യ തമിഴ് ചിത്രമാണ് കുബേര. തിരുപ്പതിയിലും പരിസര പ്രദേശങ്ങളിലുമായി സിനിമയുടെ ചിത്രീകരണം പുരോഗമിക്കുകയാണ്. ഈ വർഷം പകുതിയോടെ കുബേര തിയേറ്ററുകളിലെത്തുമെന്നാണ് വിവരം.
