ഫ്രഞ്ച് ഓപ്പണിൽ 2022ലെ വിജയം ആവർത്തിച്ച് ഇന്ത്യയുടെ ഗ്ലാമർ ജോഡി. ചൈനീസ് തായ്പേയ് സഖ്യത്തിനെ അരമണിക്കൂറിനകം വീഴ്ത്തിയാണ് സാത്വിക് സായ് രാജ്- ചിരാഗ് ഷെട്ടി സഖ്യം രണ്ടാം കിരീടം സ്വന്തമാക്കിയത്.
ലീ ജെ-ഹുയി-യാങ് പോ-ഹ്സുവാൻ ജോഡിയെ നേരിട്ടുള്ള ഗെയിമുകൾക്കാണ് ഇന്ത്യൻ ജോഡി തകർത്തത്. ചൈനീസ് തായ്പേയ് സഖ്യത്തിന് ഇന്ത്യൻ താരങ്ങൾക്കെതിരെ തരിമ്പ് വെല്ലുവിളിയുയർത്താൻ പോലുമായില്ല. 21-11,21-17 ആണ് സ്കോർ. പിഴവുകൾ വരുത്താത്ത ഇന്ത്യൻ ആധിപത്യമാണ് മത്സരത്തിലൂട നീളം കണ്ടത്.
2019-ൽ ഫ്രഞ്ച് ഓപ്പണിൽ രണ്ടാം സ്ഥാനം കൊണ്ട് തൃപ്തിപ്പെടേണ്ടി വന്ന ഇന്ത്യൻ താരങ്ങൾ 2022-ൽ കിരീടം കൊണ്ടാണ് മറുപടി പറഞ്ഞത്. ഈ സീസണിലെ ഇന്ത്യൻ ജോഡിയുടെ ആദ്യ കിരീടമാണിത്. ഈ വർഷം മലേഷ്യ സൂപ്പർ 1000, ഇന്ത്യ സൂപ്പർ 750 എന്നിവയിൽ രണ്ടാം സ്ഥാനത്തെത്തിയ ഇന്ത്യൻ ജോഡിക്ക് പാരീസ് ഒളിമ്പിക്സിൽ സ്വർണ പ്രതീക്ഷയുണ്ട്.
