മാരി സെൽവരാജന്റെ പുതിയ ചിത്രത്തിൽ ധ്രുവ് വിക്രമും അനുപമ പരമേശ്വരനും ഒന്നിക്കുന്നു. കഴിഞ്ഞ വർഷം പ്രഖ്യാപിച്ച ചിത്രത്തിന്റെ അപ്ഡേഷനുകളാണ് ഇപ്പോൾ പുറത്തുവരുന്നത്. ഒരു സ്‌പോര്‍ട്‌സ് ബയോപിക് ഡ്രാമയാണ് ചിത്രം. ധ്രുവിനോടൊപ്പം നായികയായി അനുപമ എത്തുന്നുവെന്ന വാർത്തകൾ അടുത്തിടെ പുറത്തുവന്നിരുന്നു. ഇപ്പോഴിതാ വിവരം സ്ഥിരീകരിക്കുകയാണ് സംവിധായകനായ മാരി സെൽവരാജ്. ഇരുവർക്കുമൊപ്പമുള്ള ചിത്രം ഫെയ്സ് ബുക്കിൽ പങ്കുവച്ചുകൊണ്ടാണ് മാരി സെൽവരാജ് ഇക്കാര്യം അറിയിച്ചിരിക്കുന്നത്.
മാമന്നന്റെ റിലീസിന് പിന്നാലെ കഴിഞ്ഞ വർഷമായിരുന്നു പുതിയ സിനിമയുടെ പ്രഖ്യാപനം നടന്നത്. നീലം പ്രൊഡക്ഷൻസിന്റെ ബാനറിൽ പാ രഞ്ജിത്താണ് ചിത്രം നിർമ്മിക്കുന്നത്. ബിഗ് ബജറ്റിൽ ഒരുങ്ങുന്ന സിനിമയുടെ ചിത്രീകരണം 80 ദിവസത്തോളം നീണ്ടു നിൽക്കുമെന്നാണ് അണിയറ പ്രവർത്തകർ അറിയിക്കുന്നത്. കബഡി താരം മാനതി ഗണേശന്റെ ജീവിതകഥയാണ് ചിത്രത്തിൽ പറയുന്നത്. സന്തോഷ് നാരായണനാണ് സംഗീതം ഒരുക്കുന്നത്.
ചിത്രത്തിനായി ധ്രുവ് വിക്രം വൻ മേക്കോവറാണ് നടത്തുന്നതെന്നാണ് വിവരം. ചിത്രത്തിനായി ധ്രുവ് കബഡി പരിശീലനവും നടത്തുന്നുണ്ട്. ചിത്രത്തിന്റെ ആദ്യ ഷെഡ്യൂൾ തൂത്തുക്കുടിയിൽ ആയിരിക്കും നടക്കുക. മറ്റ് താരങ്ങളെ കുറിച്ചുള്ള വിവരങ്ങൾ ഉടൻ പുറത്തുവിടുമെന്നും അണിയറ പ്രവർത്തകർ അറിയിച്ചു.
