ഈ സീസൺ അവസാനത്തോടെ ആരാധകരുടെ പ്രിയ പരിശീലകനായ ഇവാൻ വുകോമനോവിച്ച് കേരള ബ്ലാസ്റ്റേഴ്സിനോട് വിടപറയും. ഐഎഫ്‌റ്റി മീഡിയയാണ് വാർത്തകൾ പുറത്തുവിട്ടത്. വുകോമനോവിച്ചിന് യൂറോപ്പിൽ നിന്ന് ഓഫറുകളുണ്ടെന്നാണ് സൂചന. ഇന്ത്യയിൽ ബ്ലാസ്റ്റേഴിസിനെയല്ലാതെ മറ്റൊരു ടീമിനെയും പരിശീലിപ്പിക്കില്ലെന്ന് അദ്ദേഹം നേരത്തെ തന്നെ വ്യക്തമാക്കിയിട്ടുണ്ട്. ഇക്കാരണം കൊണ്ടുകൂടിയാണ് അദ്ദേഹം ഇന്ത്യ വിടുന്നത്. ഈ സീസണിൽ ഒമ്പത് വിജയവും രണ്ടു സമനിലയും ഏഴ് തോൽവിയുമാണ് ബ്സാസ്റ്റേഴ്സ് നേരിട്ടത്. അവസാന അഞ്ചു മത്സരത്തിൽ നാലെണ്ണത്തിലും കൊമ്പന്മാർക്ക് പരാജയമായിരുന്നു ഫലം.
ഇവാന് കീഴിൽ മികച്ച പ്രകടനം കാഴ്ചവയ്‌ക്കാൻ പലകുറി കൊമ്പന്മാർക്ക് കഴിഞ്ഞിട്ടുണ്ട്. ആരാധകരുടെ പിന്തുണയുള്ള പരിശീലകനാണ് വുകോമനോവിച്ച്. ഇവാന് പകരക്കാന് വേണ്ടിയുള്ള തെരച്ചിൽ ബ്ലാസ്റ്റേഴ്സ് ആരംഭിച്ചിട്ടുണ്ട്. ഇവാൻ പരിശീലകനായതിന് ശേഷമുള്ള ആദ്യ സീസണിൽ കേരള ബ്ലാസ്റ്റേഴ്സ് ഫൈനൽ കളിച്ചിരുന്നു.
വാക്കൗട്ടിനെ തുടർന്നുണ്ടായ വിവാദങ്ങളും പരിശീലകന്റെ പിന്മാറ്റത്തിന് കാരണമായിട്ടുണ്ടെന്നാണ് വിലയിരുത്തുന്നത്. ഐഎസ്എൽ ടീമുകളെ പരിശീലിപ്പിക്കുന്ന രണ്ടു മാനേജർമാരെയാണ് ബ്ലാസ്റ്റേഴ്സ് നോട്ടമിടുന്നതെന്നാണ് സൂചന. ഇവരുമായി പ്രാഥമിക ചർച്ചകൾ നടത്തിയിട്ടുണ്ടെങ്കിലും ഇത് ആരോക്കെയാണെന്ന് വെളിപ്പെ‌ടുത്തിയിട്ടില്ല.
