തെന്നിന്ത്യയുടെ പ്രിയതാരമാണ് അല്ലു അർജ്ജുൻ. മലയാളികൾക്കും ഏറെ പ്രിയങ്കരനായ താരത്തെ മല്ലു അർജുൻ എന്നാണ് ആരധകർ വിളിക്കുന്നത്. താരത്തിന്റെ ചിത്രങ്ങൾക്കും വലിയ സ്വീകാര്യതയാണ് കേരളത്തിൽ ലഭിക്കാറുള്ളത്. സമൂഹമാദ്ധ്യമങ്ങളിലും സജീവമായ താരം തന്റെ വിശേഷങ്ങളെല്ലാം ആരാധകരുമായി പങ്കുവക്കാറുണ്ട്. മിക്കപ്പോഴും അല്ലു അർജ്ജുൻ തന്റെ ആരാധകരുമായി സമയം പങ്കിടാറുണ്ട്. അത്തരത്തിൽ തന്റെ ആരാധകനൊപ്പമുള്ള താരത്തിന്റെ ഒരു വീഡിയോയാണ് ഇപ്പോൾ സമൂഹമാദ്ധ്യമങ്ങളിൽ ശ്രദ്ധ നേടുന്നത്.
അല്ലു അർജ്ജുനെ ആദ്യമായി കണ്ടപ്പോൾ സന്തോഷമടക്കാനാകാതെ കരയുന്ന ആരാധകന്റെ വീഡിയോയാണ് പുറത്തുവന്നിരിക്കുന്നത്. പൊട്ടിക്കരയുന്ന ആരാധകനെ അല്ലു അർജ്ജുൻ ചേർത്ത് പിടിച്ച് ആശ്വസിപ്പിക്കുന്നതും വീഡിയോയിൽ കാണാം. ഈ സമയം താരത്തിന്റെ സുരക്ഷാ ഉദ്യോഗസ്ഥർ അവിടേയ്ക്ക് വരുമ്പോൾ അവരെ തടയുന്നതും കാണാം. ഇയാളെ കാരവാനിലേക്ക് കൂട്ടിക്കൊണ്ടുപോയി താരം ഏറെ നേരം സംസാരിക്കുകയും ചെയ്തു. പുഷ്പ 2 എന്ന സിനിമയുടെ ചിത്രീകരണത്തിനായി അല്ലു അർജ്ജുൻ വിശാഖപട്ടണത്തെത്തിയപ്പോഴായിരുന്നു സംഭവം.
പുഷ്പ 2 എന്ന സിനിമയുടെ ചിത്രീകരണത്തിനായി കഴിഞ്ഞ ദിവസമാണ് അല്ലു അർജ്ജുനും സംഘവും വിശാഖപട്ടണത്തെത്തിയത്. ഇവിടെ വലിയ സ്വീകരണമാണ് താരത്തിന് ലഭിച്ചത്. നിരവധി ആരാധകരാണ് ലൊക്കേഷനിലടക്കം താരത്തെ കാണാനായി എത്തിയത്. വിമാനത്താവളത്തിലും നടന് സ്വീകരണം നൽകാനായി ആരാധകർ തടിച്ചുകൂടിയിരുന്നു. സുകുമാർ സംവിധാനം ചെയ്യുന്ന ‘പുഷ്പ: ദി റൂൾ’ 2024 ഓഗസ്റ്റ് 15 ന് തിയേറ്ററുകളിലെത്തും. സിനിമയുടെ അവസാനഘട്ട ചിത്രീകരണമാണ് ഇതെന്നാണ് വിവരം.