ന്യൂഡൽഹി: വരുന്ന തിരഞ്ഞെടുപ്പിൽ ആർക്ക് വോട്ട് ചെയ്യണമെന്ന് ഇപ്പോഴെ തീരുമാനിച്ചതായി ബോളിവുഡ് നടി മഹിമ ചൗധരി. തിരഞ്ഞെടുപ്പ് നടക്കുന്ന ദിവസം വരെ കാത്തിരിക്കേണ്ട ആവശ്യമില്ലെന്നും തന്റെ വോട്ട് ആർക്ക് നൽകണമെന്ന് തീരുമാനിച്ച് കഴിഞ്ഞെന്നും മഹിമ ചൗധരി പറഞ്ഞു. ബിഹാർ ഗയയിൽ മാദ്ധ്യമപ്രവർത്തകരോട് സംസാരിക്കുകയായിരുന്നു താരം.
‘രാജ്യത്തിന് വേണ്ടി പ്രധാനമന്ത്രി നരേന്ദ്രമോദി മികച്ച പ്രവർത്തനങ്ങളാണ് കാഴ്ചവച്ചത്. ആഗോളതലത്തിൽ നമ്മുടെ രാജ്യത്തിനോടുള്ള ബഹുമാനം ഇന്ന് വർദ്ധിച്ചു. നമ്മൾ സാമ്പത്തികമായി ശക്തരായി. രാജ്യത്തെ അടിസ്ഥാനസൗകര്യങ്ങളുടെ വികസനം കുതിച്ചുയരുകയാണ്. മറ്റ് രാജ്യങ്ങളിൽ നിന്നും വ്യത്യസ്തമായി നമ്മുടെ രാജ്യത്ത് സമാധാനം കൊണ്ടുവരാൻ മോദി സർക്കാർ പ്രയത്നിക്കുന്നു. ഇതിന്റെയെല്ലാം ക്രെഡിറ്റ് പ്രധാനമന്ത്രിക്ക് മാത്രമാണ്’.
‘പ്രധാനമന്ത്രി ഒരു പ്രചോദനമാണ്. എല്ലാവർക്കും അദ്ദേഹത്തിന്റെ പ്രവർത്തനങ്ങൾ പ്രയോജനം നൽകുന്നു. അദ്ദേഹം വന്ന പശ്ചാത്തലമാണ് തങ്ങളെ പ്രചോദിപ്പിക്കുന്നത്. വിശ്രമമില്ലാതെ 24 മണിക്കൂറും പ്രധാനമന്ത്രി രാജ്യത്തിനായി പ്രവർത്തിക്കുന്നു. ‘ബേഠി ബച്ചാവോ ബേഠി പഠാവോ’ എന്ന മുദ്രാവാക്യം നൽകിയത് പോലെ പ്രവർത്തികളിലൂടെ രാജ്യത്തെ ജനങ്ങളുടെ മനസ് കീഴടക്കാൻ അദ്ദേഹത്തിന് സാധിച്ചു’ – മഹിമ ചൗധരി പറഞ്ഞു.
