തിരുവനന്തപുരം: വർക്കലയിൽ ഗർഭിണിയായ 19-കാരി ആത്മഹത്യ ചെയ്തത് പഠനം തുടരാൻ കഴിയാതെ വന്നതിലുള്ള മനോവിഷമം മൂലമെന്ന് പൊലീസ്. ഒറ്റൂർ മൂങ്ങോട് സ്വദേശി ലക്ഷ്മിയെയാണ് ഇന്നലെ വാടകവീട്ടിൽ തൂങ്ങി മരിച്ചനിലയിൽ കണ്ടെത്തിയത്. ഒന്നരമാസം ഗർഭിണിയായിരുന്നു ലക്ഷ്മി.
11 മാസം മുമ്പാണ് ഓട്ടോ ഡ്രൈവറായ കിരണും ലക്ഷ്മിയും പ്രണയിച്ച് വിവാഹം കഴിച്ചത്. അവസാന വർഷ ബിരുദ വിദ്യാർത്ഥിനിയായിരുന്ന ലക്ഷ്മിയെ ഗർഭിണിയായതോടെ പഠിക്കാൻ പോകുന്നതിൽ നിന്ന് കിരൺ വിലക്കിയിരുന്നു. പഠനം മുന്നോട്ട് കൊണ്ടുപോകുന്നതിനായി ഗർഭച്ഛിദ്രം നടത്താമെന്ന ലക്ഷ്മിയുടെ ആവശ്യവും ഭർതൃവീട്ടുകാർ അംഗീകരിച്ചില്ല. ഇതാണ് ആത്മഹത്യയിലേക്ക് നയിച്ചതെന്നാണ് പൊലീസിന്റെ നിഗമനം.
സംഭവത്തിൽ കടയ്ക്കാവൂർ പോലീസ് അന്വേഷണം ആരംഭിച്ചു. ഏറെ നാളായി പ്രണയത്തിലായിരുന്ന ലക്ഷ്മിയും കിരണും വീട്ടുകാരുടെ എതിർപ്പ് മറികടന്നാണ് വിവാഹം കഴിച്ചത്. വിവാഹത്തിന് ശേഷം ലക്ഷ്മിയുടെ വീട്ടുകാരുമായി ഇരുവർക്കും ബന്ധമുണ്ടായിരുന്നില്ല. ലക്ഷ്മിയുടെ മൃതദേഹം പാരിപ്പള്ളി മെഡിക്കൽ കോളേജ് ആശുപത്രിയിൽ നടത്തിയ പോസ്റ്റുമോർട്ടത്തിന് ശേഷം മൃതദേഹം സ്വന്തം വീട്ടിൽ എത്തിച്ച് സംസ്കരിച്ചു.
