ചെന്നൈ: ഒരിടവേളയ്ക്ക് ശേഷം മഹേന്ദ്ര സിംഗ് ധോണിയും വിരാട് കോലിയും നേർക്കുനേർ വരുന്ന പോരാട്ടത്തിനാണ് ഇന്ന് ചെപ്പോക്കിലെ എം.എ ചിദംബരം സ്റ്റേഡിയം വേദിയായത്. ഇരുവരും കഴിഞ്ഞ സീസണിലാണ് ഒരുമിച്ച് ഗ്രൗണ്ടിലെത്തിയത്. ചൊപ്പോക്കിൽ വച്ചുള്ള ഇരുവരുടെയും കണ്ടുമുട്ടലാണ് ഇപ്പോൾ സമൂഹമാദ്ധ്യമങ്ങളിൽ വൈറൽ. ഈ ചിത്രം ആരാധകരും ഏറ്റെടുത്തു കഴിഞ്ഞു.
ടോസ് നേടി ബാറ്റിംഗിനിറങ്ങിയ ആർസിബിക്ക് വേണ്ടി ഓപ്പണറായി ഇറങ്ങിയത് കോലിയായിരുന്നു. ബാറ്റ് ചെയ്യാനെത്തിയ കോലി ധോണിയ്ക്കൊപ്പം സൗഹൃദം പങ്കിട്ടു. ധോണിയുടെ തോളിൽ കൈവെച്ച് സംസാരിക്കുന്ന കോലിയുടെ ദൃശ്യങ്ങളാണ് സമൂഹമാദ്ധ്യമങ്ങളിൽ വൈറലായിരിക്കുന്നത്. ധോണിയുമായുള്ള സൗഹൃദത്തെ പറ്റി കഴിഞ്ഞ ദിവസം ആർസിബി ബോൾഡ് ഡയറീസിൽ കോലി സംസാരിച്ചിരുന്നു.
താനും ധോണിയും ഒരുമിച്ച് ഗ്രൗണ്ടിലെത്തിയിട്ട് ഒരുപാട് നാളുകളായെന്ന് ആയിരുന്നു കോലിയുടെ വാക്കുകൾ. ഈ സീസണോടെ കളിക്കളത്തിലെ ധോണി- കോലി കൂട്ടുകെട്ടിനും വിരാമമാകും. ധോണി ഐപിഎല്ലിൽ നിന്ന് വിരമിക്കുമെന്ന അഭ്യൂഹങ്ങൾ ശക്തമാണ്. ഈ സീസണിൽ കളിക്കുന്നത് ആരാധകർക്ക് വേണ്ടിയുള്ള സമ്മാനമാണെന്ന് കഴിഞ്ഞ വർഷം കോലി പറഞ്ഞിരുന്നു.