ഹൈദരാബാദ്: ക്ഷയരോഗ വാക്സിനായ MTBVACന്റെ ക്ലിനിക്കൽ പരീക്ഷണങ്ങൾ രാജ്യത്ത് ആരംഭിച്ചു. സ്പാനിഷ് ബയോഫാർമസ്യൂട്ടിക്കൽ കമ്പനിയായ ബയോഫാബ്രിയുമായി സഹകരിച്ച് ഹൈദരാബാദ് ആസ്ഥാനമായി പ്രവർത്തിക്കുന്ന ഭാരത് ബയോടെക് ഇൻ്റർനാഷണൽ ലിമിറ്റഡ് വികസിപ്പിച്ച വാക്സിനാണിത്. ടിബി-ക്കെതിരെ ലോകത്ത് നിർമ്മിച്ചിട്ടുള്ള ആദ്യ വാക്സിനാണ് MTBVAC.
MTBVAC- ന്റെ സുരക്ഷയും പ്രതിരോധശേഷിയും വിലയിരുത്തുന്നതിനായി ക്ലിനിക്കൽ പരീക്ഷണങ്ങൾ പുരോഗമിക്കുകയാണ്. പ്രധാനമായും രണ്ട് കാര്യങ്ങളാണ് ലക്ഷ്യമിടുന്നതെന്ന് ഭാരത് ബയോടെക് വ്യക്തമാക്കുന്നു. ക്ഷയരോഗത്തെ തടയാനായി നവജാതശിശുക്കൾക്ക് നൽകി വരുന്ന ബിസിജി (ബാസിലസ് കാൽമെറ്റ് ഗ്യൂറിൻ) വാക്സിനേക്കാൾ കൂടുതൽ ഫലപ്രദവും ദീർഘകാലം നിലനിൽക്കുന്നതുമായ വാക്സിൻ എന്ന നിലയിലും, മുതിർന്നവരിലും കൗമാരക്കാരിലും ടിബി തടയുന്നതിനുമാണ് MTBVAC ഉപയോഗിക്കാൻ കഴിയുക.
ഇന്ത്യയിൽ പ്രതിവർഷം 1.6 ദശലക്ഷത്തിലധികം പേരുടെ ജീവനാണ് ടിബി മൂലം പൊലിഞ്ഞുപോകുന്നത്. ലോകത്തെമ്പാടും 10 ദശലക്ഷത്തിലധികം ആളുകളെ പ്രതിവർഷം ബാധിക്കുന്ന രോഗമാണിത്. മൂന്ന് പതിറ്റാണ്ടിലേറെ നീണ്ട ഗവേഷണങ്ങൾക്ക് ശേഷമാണ് MTBVAC വികസിപ്പിച്ചെടുത്തിരിക്കുന്നത്. ക്ലിനിക്കൽ പരീക്ഷണങ്ങൾ പൂർത്തിയായാൽ ലോകത്തെ ആദ്യ ടിബി വാക്സിനാകും MTBVAC. പാരീസിലെ പാസ്ചർ ഇൻസ്റ്റിറ്റ്യൂട്ടിലെ ഡോ. ബ്രിജിറ്റ് ജിക്വെലുമായി ചേർന്ന് സരഗോസ സർവകലാശാലയിലെ ലബോറട്ടറിയിലാണ് MTBVAC വികസിപ്പിച്ചത്.
