ആടുജീവിതം കാണാൻ ഒറ്റയ്ക്ക് പോകല്ലേ എന്ന് പറഞ്ഞ് നിരവധി ഫോൺകോളുകൾ വന്നതായി പൃഥിരാജിന്റെ അമ്മയും നടിയുമായ മല്ലിക സുകുമാരൻ. ഈ സിനിമയിലെ നായകന്റെ സമ്മർദം അമ്മയായ തനിക്ക് ഒറ്റയ്ക്ക് താങ്ങാൻ കഴിയില്ലെന്ന ആശങ്കയാണ് ഫോൺ കോളുകളിൽ നിറയുന്നതെന്ന് അവർ പറഞ്ഞു. അഭിനയ ജീവിതത്തിൽ അരനൂറ്റാണ്ട് പൂർത്തിയാക്കിയ വേളയിൽ ജനം ടിവിയോട് സംസാരിക്കുകയായിരുന്നു മല്ലിക സുകുമാരൻ.
സിനിമ കാണാൻ പോകുന്നെന്ന് പറഞ്ഞപ്പോൾ സഹോദരനായ ഡോക്ടറെ കൂടെ കൊണ്ടു പോകൂ എന്നാണ് എല്ലാരും പറയുന്നത്. ഹൃദയഭേദകമാണ് കാഴ്ചകളാണ്. ഇത് കണ്ടിട്ട് ഞങ്ങൾക്കേ താങ്ങാൻ പറ്റുന്നില്ല. അപ്പോൾ അമ്മയുടെ സ്ഥിതി എന്തായിരിക്കുമെന്ന് പറയണ്ടതില്ലല്ലോ, എന്നാണ് അവരുടെ സന്ദേഹം മല്ലിക പറഞ്ഞു.
പൃഥിയുടെ വേഷത്തെ അഭിനന്ദിച്ച് നിരവധി ഫോൺ കോളുകൾ വരുന്നതായും മല്ലിക കൂട്ടിച്ചേർത്തു. ഈ സിനിമയ്ക്കായി അവൻ ഒത്തിരി കഷ്ടപ്പെട്ടു. ഈ പടത്തിന് വേണ്ടി ഞാൻ അറിയാതെ പോയി 30 കിലോ കുറച്ചു. അവിടെ പോയിട്ട് ഭക്ഷണം കഴിക്കാതെയും വെള്ളം കുടിക്കാതെയും കിടന്നു. അവന് അസുഖം വരുമോ, തിരിച്ച് വരുമോ എന്നൊക്കെയായിരുന്നു പേടി. ദൈവത്തിനോട് ഒരുപാട് പ്രാർത്ഥിച്ചു. ഇപ്പോൾ അവൻ പഴയപടിയായി, മല്ലിക സുകുമാരൻ കൂട്ടിച്ചേർത്തു.
