രാജ്യത്തിന്റെ പുരോഗതിക്കായി നൽകിയ സംഭാവനകൾക്കുള്ള ആദരം; നവയുഗം കെട്ടിപ്പടുത്തതിൽ എൽകെ അദ്വാനിയുടെ പങ്ക് നിർണായകം: പ്രധാനമന്ത്രി

ന്യൂഡൽഹി: മുൻഉപപ്രധാനമന്ത്രിയും മുതിർന്ന ബിജെപി നേതാവുമായ ലാൽകൃഷ്ണ അദ്വാനിയെ രാജ്യം ഭാരതരത്‌ന പുരസ്‌കാരം നൽകി ആദരിച്ചതിൽ സന്തോഷം അറിയിച്ച് പ്രധാനമന്ത്രി നരേന്ദ്രമോദി. ഭാരതത്തിന്റെ പുരോഗതിക്കായി എൽകെ അദ്വാനി ജി നൽകിയ സംഭാവനകൾക്കുള്ള അംഗീകാരമാണ് അദ്ദേഹത്തിന് നൽകിയതെന്ന് പ്രധാനമന്ത്രി കുറിച്ചു. എക്‌സിലൂടെയായിരുന്നു പ്രധാനമന്ത്രിയുടെ പ്രതികരണം.

” ശ്രീ എൽ കെ അദ്വാനിക്ക് ഭാരതരത്ന സമ്മാനിക്കുന്നതിന് സാക്ഷ്യം വഹിക്കാൻ സാധിച്ചതിൽ വളരെയധികം അഭിമാനം തോന്നുന്നു. ഈ ബഹുമതി നമ്മുടെ രാജ്യത്തിന്റെ പുരോഗതിക്കായി അദ്ദേഹം നൽകിയ സംഭാവനകൾക്കുള്ള അംഗീകാരമാണ്. പൊതുസേവനത്തോടുള്ള അദ്ദേഹത്തിന്റെ സമർപ്പണവും നവയുഗം രൂപപ്പെടുത്തിയതിൽ അദ്ദേഹം വഹിച്ച നിർണായക പങ്കും എടുത്ത് പറയേണ്ടിരിക്കുന്നു. അദ്ദേഹത്തിന്റെ പ്രവർത്തനങ്ങൾ ഭാരതത്തിന്റെ ചരിത്രത്തിൽ മായാത്ത മുദ്ര പതിപ്പിച്ചിട്ടുണ്ട്. കഴിഞ്ഞ ഏതാനും പതിറ്റാണ്ടുകളായി അദ്ദേഹത്തോടൊപ്പം വളരെ അടുത്ത് പ്രവർത്തിക്കാൻ അവസരം ലഭിച്ചതിൽ ഞാൻ അഭിമാനിക്കുന്നു.”- പ്രധാനമന്ത്രി കുറിച്ചു.

PM Narendra Modi tweets, “It was very special to witness the conferring of the Bharat Ratna upon Shri LK Advani Ji. This honour is a recognition of his enduring contributions to our nation’s progress. His dedication to public service and his pivotal role in shaping modern India… pic.twitter.com/avhD6zSyXV

— ANI (@ANI) March 31, 2024

രാഷ്‌ട്രപതി ദ്രൗപദി മുർമു എൽകെ അദ്വാനിയുടെ വസതിയിലെത്തിയാണ് ഭാരതരത്ന നൽകിയത്. പ്രധാനമന്ത്രി നരേന്ദ്രമോദി, ഉപരാഷ്‌ട്രപതി തുടങ്ങിയവരും സന്നിഹിതരായിരുന്നു. അനാരോഗ്യം കാരണം ശനിയാഴ്ച രാഷ്‌ട്രപതി ഭവനിൽ സംഘടിപ്പിച്ച ചടങ്ങിൽ പങ്കെടുക്കാൻ എൽകെ അദ്വാനിക്ക് സാധിക്കാത്തതിനാൽ രാഷ്‌ട്രപതി നേരിട്ടെത്തി ഭാരതരത്‌ന നൽകുകയായിരുന്നു.