സോൾ: പുതിയ സോളിഡ്-ഫ്യുവൽ ഹൈപ്പർസോണിക് മിസൈൽ പരീക്ഷിച്ചുവെന്ന റിപ്പോർട്ടുകൾ ശരിവച്ച് ഉത്തരകൊറിയ. ഉത്തര കൊറിയൻ നേതാവ് കിം ജോങ് ഉൻ നേരിട്ട് എത്തി മിസൈൽ പരീക്ഷണം പരിശോധിച്ചുവെന്നാണ് വിവരം. തങ്ങളുടെ പ്രതിരോധ സാങ്കേതിക വിദ്യയുടെ മികവ് വെളിവാക്കുന്നതാണ് പുതിയ പരീക്ഷണമെന്നാണ് ഇവർ അവകാശപ്പെടുന്നത്. രാജ്യത്തിന്റെ പക്കലുള്ള തന്ത്രപ്രധാനമായ ആയുധമെന്നാണ് ഉത്തര കൊറിയൻ മാദ്ധ്യമമായ റോഡോംഗ് സിൻമുൻ പുറത്ത് വിട്ട റിപ്പോർട്ടിൽ പറയുന്നത്.
മിസൈൽ വിക്ഷേപണം വിജയമായിരുന്നുവെന്നും ഇവർ പറയുന്നു. കഴിഞ്ഞ ദിവസം ജപ്പാൻ കടലിലേക്ക് ഉത്തര കൊറിയ ബാലിസ്റ്റിക് മിസൈൽ തൊടുത്തിരുന്നു. ഉത്തര കൊറിയയുടെ നീക്കത്തെ ശക്തമായി അപലപിച്ച് ദക്ഷിണ കൊറിയ, ജപ്പാൻ, അമേരിക്ക എന്നീ രാജ്യങ്ങൾ രംഗത്തെത്തിയിട്ടുണ്ട്. രണ്ടാഴ്ച മുൻപ് കിം ജോങ് ഉന്നിന്റെ നേതൃത്വത്തിൽ ഇന്റർമീഡിയറ്റ് റേഞ്ച് ഹൈപ്പർസോണിക് മിസൈലിന്റെ പരീക്ഷണവും നടന്നിരുന്നു.
ഈ വർഷം ഇത് മൂന്നാം വട്ടമാണ് ഉത്തര കൊറിയ ബാലിസ്റ്റിക് മിസൈലിന്റെ പരീക്ഷണം നടത്തുന്നത്. ജനുവരിയിലും മാർച്ചിലുമാണ് ആദ്യ പരീക്ഷണങ്ങൾ നടന്നത്. ദക്ഷിണ കൊറിയയിൽ പ്രസിഡന്റ് യൂൻ സുക് യോളിന്റെ നേതൃത്വത്തിൽ നടന്ന പരിപാടിയിൽ പങ്കെടുക്കുന്നതിനായി യുഎസ് സ്റ്റേറ്റ് സെക്രട്ടറി ആന്റണി ബ്ലിങ്കൻ മാർച്ചിൽ സോൾ സന്ദർശിച്ചപ്പോഴാണ് അവസാനമായി ഉത്തര കൊറിയ മിസൈൽ വിക്ഷേപണം നടത്തിയത്. ദക്ഷിണ കൊറിയയുമായുള്ള ബന്ധത്തിൽ ഉലച്ചിൽ ശക്തമായതോടെയാണ് വീണ്ടും ബാലിസ്റ്റിക് മിസൈൽ വിക്ഷേപിച്ചത്.
ഇരുരാജ്യങ്ങൾക്കുമിടയിലുള്ള തർക്കം രൂക്ഷമായ സാഹചര്യത്തിൽ ഏത് സമയവും യുദ്ധം ഉണ്ടായേക്കാമെന്നും ഉത്തരകൊറിയൻ നേതാവ് കിം ജോങ് ഉൻ മുന്നറിയിപ്പ് നൽകിയിരുന്നു. 0.001 മില്ലിമീറ്റർ പോലും അതിർത്തി ലംഘനം കണ്ടെത്തിയാൽ ആ നിമിഷം യുദ്ധമാണെന്നാണ് കിം ജോങ് ഉൻ ഭീഷണി മുഴക്കിയിരിക്കുന്നത്. തങ്ങളുടെ പ്രധാന ശത്രുവായിട്ടാണ് ദക്ഷിണ കൊറിയയെ ഉത്തര കൊറിയ പ്രഖ്യാപിച്ചിരിക്കുന്നത്. യുദ്ധത്തിന് മുന്നൊരുക്കങ്ങൾ നടത്തണമെന്നും കിം ജോങ് തന്റെ സൈനികർക്ക് നിർദ്ദേശം നൽകിയിരുന്നു.
