ഹൈദരാബാദ്: ഗീതാഗോവിന്ദം എന്ന ഹിറ്റ് ചിത്രത്തിന് ശേഷം സംവിധായകൻ പരശുറാം പെറ്റ്ലയും വിജയ് ദേവരക്കൊണ്ടയും ഒരുമിച്ച ഏറ്റവും പുതിയ ചിത്രമാണ് ഫാമിലി സ്റ്റാർ. ബോളിവുഡ് താരം മൃണാൾ താക്കൂറാണ് ചിത്രത്തിൽ നായികയായി എത്തിയത്. ഏപ്രിൽ 5 ന് തിയേറ്ററുകളിലെത്തിയ ചിത്രം സമ്മിശ്ര അഭിപ്രായം നേടി പ്രദർശനം തുടരുകയാണ്.
ആദ്യ ഷോ കഴിഞ്ഞപ്പോൾ മുതൽ ചിത്രത്തിനെതിരെ സോഷ്യൽ മീഡിയയിൽ നെഗറ്റീവ് ക്യാംമ്പയിൻ നടക്കുകയാണ്. ഇതിനെതിരെ പരാതിയുമായി രംഗത്തെത്തിയിരിക്കുകയാണ് ചിത്രത്തിന്റെ അണിയറ പ്രവർത്തകർ. ചിത്രത്തിന്റെ നിർമാതാക്കൾ സൈബർ ക്രൈം സെല്ലിന് പരാതി നൽകി. ഇത്തരം നെഗറ്റീവ് ക്യാംപെയ്നുകൾ സിനിമയുടെ പ്രദർശനത്തെ ബാധിക്കുന്നു എന്ന് ചൂണ്ടിക്കാട്ടിയായിരുന്നു പരാതി.
സംഭവത്തിൽ മാധാപൂർ പൊലീസിനും പരാതി നൽകിയിട്ടുണ്ട്. നടൻ വിജയ് ദേവരക്കൊണ്ടയെയും ഫാമിലി സ്റ്റാർ എന്ന സിനിമയേയും കുറിച്ച് വ്യാജ പ്രചരണം നടത്തുന്നുവെന്നാണ് പരാതി. സംഭവത്തിൽ ഉചിതമായ നടപടി സ്വീകരിക്കുമെന്ന് പൊലീസ് അറിയിച്ചു. നെഗറ്റീവ് ക്യാംപെയിൻ നടത്തുന്ന യൂസർ ഐഡികൾ കണ്ടെത്താൻ പൊലീസ് അന്വേഷണം ആരംഭിച്ചു.
