സിനിമ ആസ്വാദകർ ഏറെ ആവേശത്തോടെ കാത്തിരിക്കുന്ന ചിത്രമാണ് ലോകേഷ് കനകരാജിന്റെ ഫാൻ ബോയ് ചിത്രം തലൈവർ171. ചിത്രത്തിന്റെ പ്രഖ്യാപനം മുതൽ ഓരോ അപ്‌ഡേറ്റും ആവേശത്തോടെയാണ് ആരാധകർ ഏറ്റെടുക്കുന്നത്. കഴിഞ്ഞ ദിവസം സിനിമയുടെ ഫസ്റ്റ്‌ലുക്ക് പോസ്റ്റർ പുറത്തുവന്നിരുന്നു. 22നാണ് ചിത്രത്തിന്റെ ടൈറ്റിൽ റിലീസ് പ്രഖ്യാപിച്ചിരിക്കുന്നത്.
ഇപ്പോഴിതാ ചിത്രത്തിന്റെ പുതിയ അപ്‌ഡേറ്റുകൾ പുറത്തുവന്നിരിക്കുകയാണ്. നീണ്ട ഇടവേളയ്‌ക്ക് ശേഷം മൈക്ക് മോഹൻ ചിത്രത്തിൽ ഒരു പ്രധാന കഥാപാത്രത്തെ അവതരിപ്പിക്കുമെന്നാണ് വിവരം. മോഹൻ പ്രതിനായക വേഷത്തിൽ എത്തുമെന്നും റിപ്പോർട്ടുകൾ ഉണ്ട്. വിജയ് സേതുപതിയും ചിത്രത്തിൽ സുപ്രധാന വേഷത്തിലെത്തുമെന്നാണ് വിവരം.
ഫസ്റ്റ്‌ലുക്ക് പോസ്റ്ററിൽ വളരെ വ്യത്യസ്തമായ ലുക്കിലാണ് രജനികാന്ത് എത്തിയത്. ജയിലറിലെ മുത്തുവേൽ പാണ്ഡ്യനുമായി സാമ്യമുള്ള ഒരു വേഷമാണ് രജനിക്കായി ലോകേഷ് തിരഞ്ഞെടുത്തിരിക്കുന്നതെന്നാണ് റിപ്പോർട്ടുകൾ. ജയിലർ വൻ ഹിറ്റായതോടെ ഈ കഥാപാത്രം ആവർത്തനമായേക്കുമെന്ന സംശയം ചിലർ പങ്കുവയ്‌ക്കുന്നുണ്ട്.
അതേസമയം രാഘവ ലോറൻസ്, പൃഥ്വിരാജ് സുകുമാരൻ, എന്നിവരെ കൂടാതെ മറ്റ് പാൻ ഇന്ത്യൻ താരങ്ങളും തലൈവർ 171ൽ എത്തുമെന്നും റിപ്പോർട്ടുകളുണ്ട്. വൻ മുതൽ മുടക്കിൽ സൺ പിക്ചേഴ്സ് ആണ് ചിത്രം നിർമിക്കുന്നത്. സിനിമയുടെ പ്രീപ്രൊഡക്ഷൻ ജോലികൾ പുരോഗമിക്കുകയാണ്. ഈ മാസം ഷൂട്ടിംഗ് ആരംഭിക്കുമെന്നാണ് റിപ്പോർട്ടുകൾ.
