മലയാളികൾ പടക്കം പൊട്ടിച്ച് ആഘോഷിക്കുന്ന പ്രധാനപ്പെട്ട ഉത്സവമാണ് വിഷു. ഈ വിഷുക്കാലം മലയാള സിനിമയും ഹിറ്റുകൾ പൊട്ടിക്കുകയാണ്. ജയ് ഗണേഷ്, ആവേശം, വര്ഷങ്ങള് ശേഷം മൂന്ന് സിനിമകളാണ് ഇന്ന് തിയേറ്ററിലെത്തിയത്. ആദ്യ ഷോ കഴിഞ്ഞപ്പോൾ തന്നെ മൂന്ന് സിനിമയ്ക്കും മികച്ച പ്രേക്ഷകാഭിപ്രായം ലഭിക്കുന്നുണ്ട്. തിയേറ്ററിലേക്ക് മൂന്ന് തരത്തിലെ പ്രേക്ഷകരെ എത്തിക്കാൻ കഴിയുന്നു എന്ന അഭിപ്രായമാണ് ലഭിക്കുന്നത്.
ജയ്ഗണേഷിലൂടെ കുട്ടികളെയും മുതിർന്നവരെയും ഒരുപോലെ തിയേറ്ററിലെത്തിക്കുമ്പോൾ കുടുംബ പ്രേക്ഷകരെയാണ് വർഷങ്ങൾക്ക് ശേഷത്തിലൂടെ വിനീത് ശ്രീനിവാസൻ ലക്ഷ്യമിട്ടത്. ഒരു എന്റർടെയ്ൻമെന്റ പാക്കേജുമായി ഫഹദ് ഫാസിലിന്റെ ആവേശം യുവാക്കൾക്ക് ഹരമായി മാറിയിട്ടുണ്ട്.
എല്ലാവരിലും ഒരു സൂപ്പർ ഹീറോ ഉണ്ടെന്ന സന്ദേശം ലഭിക്കുന്ന ചിത്രമാണ് ജയ് ഗണേഷ് എന്നാണ് പ്രേക്ഷകർ ഒന്നടങ്കം പറയുന്നത്. കുട്ടികൾക്കും മുതിർന്നവർക്കും ഒരുപോലെ ഇഷ്ടപ്പെടുന്ന സൂപ്പർ ഹീറോയായി ഉണ്ണിമുകുന്ദൻ എത്തുന്നുണ്ട്. ഇതുവരെ കണ്ടിട്ടില്ലാത്ത ഉണ്ണി മുകുന്ദനാണ് ചിത്രത്തില് ഉള്ളത്. അശോകനും ജോമോളുമടക്കമുള്ളവര് മികച്ച പ്രകടനമാണ് ചിത്രത്തില് നടത്തിയിരിക്കുന്നത്.
പ്രേക്ഷകരെ പിടിച്ചിരുത്തുന്ന ഒരു മാജിക് വിനീത് ശ്രീനിവാസൻ സിനിമകളിൽ കാണാൻ സാധിക്കും. ഇത്തവണയും അതിനൊരു മാറ്റവും വന്നിട്ടില്ലെന്ന് അടിവരയിട്ട് പറയാവുന്ന ചിത്രമാണ് വർഷങ്ങൾക്കുശേഷം. ധ്യാൻ മികച്ച അഭിനേതാവാണെന്ന് തെളിയിച്ച് പ്രണവിനൊപ്പം നല്ലൊരു കെമസ്ട്രിയാണ് കാഴ്ചവെക്കുന്നത്. നിവിൻ പോളിയുടെ വൺ മാൻ ഷോയാണ് സെക്കൻഡ് ഹാഫിലെന്നാണ് പ്രേക്ഷകരുടെ അഭിപ്രായം. എല്ലാവരും ആസ്വദിക്കാവുന്ന തരത്തിലെ മികച്ച മേക്കിംഗും തിരക്കഥയും അവകാശപ്പെടാവുന്ന ചിത്രമാണ് വർഷങ്ങൾക്കുശേഷം.
സുഷിൻ ശ്യാമിന്റെ മ്യൂസിക്കാണ് ആവേശത്തിലെ പ്രധാന ഘടകം. ഫുൾ എന്റർടെയ്ൻമെന്റ് പാക്കാണ് ചിത്രമെങ്കിലും ഇടയ്ക്കെങ്കിലും കഥയില്ലാതെ ആട്ടമാടുന്ന ചിത്രമാണെന്ന അഭിപ്രായം പ്രേക്ഷകർക്കുണ്ട്. ജിത്തുമാധവന്റെ സംവിധാനത്തിലെത്തിയ ചിത്രത്തിന് സമ്മിശ്ര പ്രതികരണങ്ങളാണ് ലഭിക്കുന്നത്. ഫഹദ് തന്റെ ഭാഗം ഗംഭീരമാക്കിയിട്ടുണ്ടെങ്കിലും ചെറിയൊരു ഇഴച്ചിൽ സിനിമയ്ക്കുണ്ടെന്നാണ് പ്രേക്ഷകാഭിപ്രായം.
