കോട്ടയം: ഗൂഗിൾ പേ ചെയ്തപ്പോൾ ശബ്ദ സന്ദേശം കേട്ടില്ലെന്ന് പറഞ്ഞ് പമ്പ് ജീവനക്കാരനെ മർദ്ദിച്ച സംഭവത്തിൽ രണ്ട് പേർ അറസ്റ്റിൽ. വെള്ളൂർ വടകര സ്വദേശികളായ അക്ഷയ് സജി, ആഷിക് കെ ബാബു എന്നിവരാണ് പിടിയിലായത്.
കോട്ടയം തലയോലപ്പറമ്പിലെ പെട്രോൾ പമ്പിൽ ഞായറാഴ്ച രാത്രിയാണ് ആക്രമണം നടന്നത്. അക്രമത്തിൽ പെട്രോൾ പമ്പ് ജീവനക്കാരന് മർദ്ദനമേൽക്കുകയും നാട്ടുകാരനായ ഒരാൾക്ക് കുത്ത് ഏൽക്കുകയും ചെയ്തിരുന്നു. പമ്പ് ജീവനക്കാരനായ അപ്പച്ചനെയാണ് ഇരുവരും ക്രൂരമായി മർദ്ദിച്ചത്.
വാഹനത്തിൽ പെട്രോൾ നിറയ്ക്കാനെത്തിയ യുവാക്കളാണ് പ്രശ്നം ഉണ്ടാക്കിയത്. യുവാക്കള് പണം ഗൂഗിൾ പേ വഴിയാണ് കൈമാറിയത്. എന്നാൽ, ശബ്ദ സന്ദേശം സന്ദേശം കേട്ടതുമില്ല. ഇക്കാര്യം പറഞ്ഞാണ് പമ്പ് ജീവനക്കാരനെ ക്രൂരമായി മർദ്ദിച്ചത്. അക്രമം നടത്തിയ യുവാക്കളെ പിന്തിരിപ്പിക്കാനെത്തിയ നാട്ടുകാരനായ വിപി ഷാ എന്നയാളെയാണ് ഇവർ ടൗണിൽ വെച്ച് കുത്തിപ്പരിക്കേൽപിച്ചത്. ഷായുടെ ശരീരത്തിലുണ്ടായ മുറിവിൽ എട്ടു തുന്നലുകളുണ്ട്.
