ബെംഗളൂരു: കോൺഗ്രസിനെ കടന്നാക്രമിച്ച് ഗോവ മുഖ്യമന്ത്രി പ്രമോദ് സാവന്ത്. കഴിഞ്ഞ 50 വർഷം കോൺഗ്രസ് രാജ്യത്ത് ഭരിച്ചെങ്കിലും വികസനങ്ങളൊന്നും നടപ്പിലാക്കിയില്ലെന്നും എന്നാൽ 10 വർഷം കൊണ്ട് ബിജെപി രാജ്യത്ത് മാറ്റങ്ങൾ കൊണ്ടുവന്നെന്നും അദ്ദേഹം പറഞ്ഞു. 180 സീറ്റുകൾ പോലും ബിജെപിക്ക് നേടാനാകില്ലെന്ന പ്രിയങ്കയുടെ പ്രസ്താവനയ്ക്കെതിരെ കർണാടകയിലെ ബെലഗാവിയിൽ മാദ്ധ്യമങ്ങളോട് പ്രതികരിക്കുകയായിരുന്നു അദ്ദേഹം.
” ബിജെപിക്ക് 180 സീറ്റുകൾ പോലും നേടാനാവില്ലെന്നാണ് പ്രിയങ്കയുടെ വാദം. കഴിഞ്ഞ 50 വർഷത്തിലധികം കോൺഗ്രസ് ഈ രാജ്യത്ത് ഭരിച്ചു. എന്ത് നേട്ടമാണ് രാജ്യത്തുണ്ടായത്? കഴിഞ്ഞ 10 വർഷത്തിനുള്ളിൽ ബിജെപി രാജ്യത്തുണ്ടാക്കിയ മാറ്റങ്ങൾ അനവധിയാണ്. 50 വർഷം കൊണ്ടും കോൺഗ്രസിന് നടപ്പിലാക്കാൻ സാധിക്കാത്ത പല കാര്യങ്ങളും ഇന്ന് ബിജെപി നടപ്പിലാക്കിയിരിക്കുന്നു.”- പ്രമോദ് സാവന്ത് പറഞ്ഞു.
വികസിത ഭാരതത്തിനായി നരേന്ദ്രമോദിയെ തന്നെയാണ് രാജ്യത്തെ ജനങ്ങൾ വരുന്ന തെരഞ്ഞെടുപ്പിലും അധികാരത്തിലേറ്റുക. മഹാരാഷ്ട്രയിലും കർണാടകയിലും എൻഡിഎ ഭൂരിഭാഗം സീറ്റുകളും കയ്യടക്കുമെന്നും പ്രമോദ് സാവന്ത് വ്യക്തമാക്കി.