ബോക്സോഫീസിൽ 50 കോടി ക്ലബിൽ ഇടം നേടി വിനീത് ശ്രീനിവാസൻ ചിത്രം ‘വർഷങ്ങൾക്കു ശേഷം’. ചിത്രം ഒരാഴ്ചക്കുള്ളിലാണ് 50 കോടി ക്ലബിൽ ഇടം നേടുന്നത്. ഹൃദയത്തിന് ശേഷം വിനീത് ശ്രീനിവാസൻ – വിശാഖ് സുബ്രഹ്മണ്യം കൂട്ടുകെട്ടിൽ അൻപത് കോടി നേടുന്ന രണ്ടാമത്തെ ചിത്രം കൂടിയാണിത്.
സൗഹൃദവും പ്രണയവും സിനിമയും എല്ലാം ഉൾക്കൊള്ളുന്ന ഒരു വിനീത് ശ്രീനിവാസൻ മാജിക് തന്നെയാണ് വർഷങ്ങൾക്കു ശേഷം. മെറിലാൻഡ് സിനിമാസ് നിർമ്മിച്ചിരിക്കുന്ന ചിത്രത്തിൽ വേണു, മുരളി എന്ന രണ്ട് ആത്മാർത്ഥ സുഹൃത്തുക്കളെ ചുറ്റിപ്പറ്റിയാണ് കഥ മുന്നോട്ട് പോകുന്നത്. ധ്യാൻ ശ്രീനിവാസനും പ്രണവ് മോഹൻലാലുമാണ് ചിത്രത്തിലെ നായകന്മാർ.
ചിത്രത്തിന് ആദ്യദിനം മുതൽ പ്രേക്ഷകരിൽ നിന്നും വൻ സ്വീകാര്യതയാണ് ലഭിച്ചത്. നിവൻ പോളി, അജു വർഗീസ്, കല്യാണി പ്രിയദർശൻ, ബേസിൽ ജോസഫ്, വിനീത് ശ്രീനിവാസൻ, നീരജ് മാധവ്, നീത പിള്ളൈ, അർജുൻ ലാൽ, അശ്വത് ലാൽ, കലേഷ് രാംനാഥ്, ഷാൻ റഹ്മാൻ എന്നിങ്ങനെ ഒരു വലിയ താരനിര തന്നെയാണ് ചിത്രത്തിൽ അണിനിരക്കുന്നത്.