മോഹൻലാൽ അവതരിപ്പിച്ച നൃത്തമാണ് കഴി‍ഞ്ഞ ദിവസം മുതൽ സമൂഹമാദ്ധ്യമങ്ങളിൽ വൈറലായിരിക്കുന്നത്. ഷാരൂഖ് ഖാന്റെ ‘ജവാൻ’ സിനിമയിലെ ഗാനത്തിനായിരുന്നു മോഹൻലാൽ ചടുലമായ നൃത്തം ചെയ്തത്. ഇതിന് പിന്നാലെ ഷാരൂഖ് ഖാൻ മോഹൻലാലിന് പ്രശംസയും അറിയിച്ചിരുന്നു. താരത്തിന്റെ വാക്കുകൾക്ക് മറുപടിയുമായി എത്തിയിരിക്കുകയാണ് മോഹൻലാൽ.
ഷാരൂഖിനെപ്പോലെ ചുവടുവയ്‌ക്കാൻ മറ്റാർക്കും സാധിക്കില്ലെന്നും നല്ല വാക്കുകൾ പറഞ്ഞതിന് നന്ദിയെന്നുമാണ് മോഹൻലാൽ പറഞ്ഞത്. വീട്ടിലേക്ക് അത്താഴത്തിനു ക്ഷണിച്ച ഷാരൂഖിനോട് രസകരമായ മറുപടിയാണ് മോഹൻലാൽ പറഞ്ഞത്.
‘ഷാരൂഖ്, നിങ്ങളെപ്പോലെ മറ്റാർക്കും സാധിക്കില്ല. അനുകരണം പോലും അസാധ്യമാകു വിധം നിങ്ങളെപ്പോഴും സ്വന്തം ശൈലിയിൽ ജീവിക്കുന്ന ആളാണ്. ഒറിജനൽ സിന്ദാ ബന്ദാ! നിങ്ങളുടെ വാക്കുകൾക്ക് ഒരുപാട് നന്ദി. അത്താഴം മാത്രം മതിയോ? പ്രാതലിലും നമുക്കൊരു ‘സിന്ദാ ബന്ദാ’ നോക്കിയാലോ?’-എന്നായിരുന്നു മോഹൻലാൽ എക്സിൽ കുറിച്ചത്.
അറ്റ്ലിയുടെ സംവിധാനത്തിൽ 2023-ൽ പുറത്തിറങ്ങിയ ചിത്രമാണ് ജവാൻ. ചിത്രത്തിൽ ഏറ്റവും അധികം പ്രേക്ഷക പ്രശംസ ലഭിച്ച ഗാനമാണ് ‘സിന്ദാ ബാന്ദ’. ഷാരൂഖ് ഖാൻ, പ്രിയാ മണി എന്നിവർ ചേർന്ന് അവതരിപ്പിച്ച ഗാനത്തിന് ഈണം പകർന്നത് അനിരുദ്ധ് രവിചന്ദർ ആണ്. ഇർഷാദ് കാമിലാണ് വരികൾ രചിച്ചത്.
മോഹൻലാൽ കൊച്ചിയിൽ നടന്ന ഒരു പുരസ്കാര നിശയിലാണ് നൃത്തം കാഴ്ചവച്ചത്. വീഡിയോ വൈറലായതോടെ ലാലേട്ടൻ ഫാൻസിന്റെ സോഷ്യൽ മീഡിയ അക്കൗണ്ടുകളിലുൾപ്പെടെ ഡാൻസ് തരംഗമാവുകയാണ്.
Done sir. Your place or mine? https://t.co/5kvZQYrWEi
— Shah Rukh Khan (@iamsrk) April 23, 2024
