തിരുവനന്തപുരം: സംസ്ഥാനത്ത് പാലക്കാട്, തൃശൂർ, കൊല്ലം ജില്ലകളിൽ ഉഷ്ണ തംരഗത്തിന് സാധ്യതയെന്ന് മുന്നറിയിപ്പ്. ജനങ്ങൾ ജാഗ്രത പുലർത്തണമെന്നും അനാവശ്യമായി പുറത്തിറങ്ങുന്നത് ഒഴിവാക്കണമെന്നും ദുരന്ത നിവാരണ അതോറിറ്റി മുന്നറിയിപ്പ് നൽകി. സംസ്ഥാനത്ത് വരും ദിവസങ്ങളിലും താപനില ഉയർന്നേക്കാമെന്ന കാലാവസ്ഥാ നിരീക്ഷണവകുപ്പിന്റെ പ്രവചനത്തിന് പിന്നാലെയാണ് ഉഷ്ണതരംഗ മുന്നറിയിപ്പും.
ചൂട് വർദ്ധിച്ചതിനാൽ തീപിടിത്തത്തിനുള്ള സാധ്യത കൂടുതലാണെന്നും അപകടങ്ങൾ ഒഴിവാക്കാനായി ജാഗ്രത പുലർത്തണമെന്നും ദുരന്ത നിവാരണ അതോറിറ്റിയുടെ നിർദേശത്തിൽ പറയുന്നു. ഉണങ്ങിയ മാലിന്യങ്ങൾ, കടലാസ്, പ്ലാസ്റ്റിക്കുകൾ ഇവ അലക്ഷ്യമായി വലിച്ചെറിയുന്നത് ഒഴിവാക്കണമെന്നും മാർക്കറ്റുകൾ, മാലന്യശേഖരണ കേന്ദ്രങ്ങൾ എന്നിവിടങ്ങളിൽ പ്രത്യേക ശ്രദ്ധവേണമെന്നും നിർദ്ദേശത്തിൽ പറയുന്നുണ്ട്. ഇത്തരം സ്ഥാപനങ്ങളുടെ സമീപത്ത് താമസിക്കുന്നവർ പ്രത്യേകം ജാഗ്രത പുലർത്തണമെന്നും അധികൃതർ പറയുന്നു.
വൈദ്യുത ഉപകരണങ്ങൾ ഏറെ നേരം പ്രവർത്തിപ്പിക്കുന്നതിനാൽ ഇവയുടെ വയറുകൾ ഉരുകി തീപിടിക്കാനുള്ള സാധ്യത കൂടുതലാണ്. അതിനാൽ ഉപയോഗ ശേഷം ഇവ കൃത്യമായി ഓഫ് ചെയ്തിടാൻ ശ്രദ്ധിക്കണം. രാത്രിയിൽ ഓഫീസുകളിലും, ഉപയോഗം ഇല്ലാത്ത മുറികളിലെയും ഫാൻ, ലൈറ്റ്, എസി എന്നിവ ഓഫ് ചെയ്തിടാൻ ശ്രദ്ധിക്കണമെന്നും നിർദ്ദേശത്തിൽ പറയുന്നു. ഇന്ന് 12 ജില്ലകളിലാണ് താപനില മുന്നറിയിപ്പ് നൽകിയിരിക്കുന്നത്.
