ടി20 ലോകകപ്പിനുള്ള ടീം പ്രഖ്യാപനം അടുത്തിരിക്കെ മലയാളി താരവും രാജസ്ഥാൻ റോയൽസ് നായകനുമായ സഞ്ജു സാസംണെ പിന്തുണച്ച് മാത്യു ഹെയ്ഡനും കെവിൻ പീറ്റേഴ്സണും അടക്കമുള്ള മുൻ താരങ്ങൾ. ലോകകപ്പിനായി യാത്രതിരിക്കുന്ന ടീം ഇന്ത്യക്ക് ഒപ്പം സഞ്ജു സാംസണും ഉണ്ടായിരിക്കണമെന്നാണ് ഇരുവരും പറയുന്നത്.
അർഹിക്കുന്ന ബഹുമതികൾ ലഭിക്കുന്നില്ലെങ്കിലും നായകന്റെ സമ്മർദത്തിനിടയിലും മികച്ച പ്രകടനമാണ് സഞ്ജു കാഴ്ചവയ്ക്കുന്നത്. താനാണ് ടീം സെലക്ടറെങ്കിൽ എന്തായാലും അദ്ദേഹത്തെ ടീമിൽ ഉൾപ്പെടുത്തുമെന്നും പീറ്റേഴ്സൺ പറഞ്ഞു. ലോകകപ്പ് ടീമിൽ ഇടംനേടാൻ അർഹതയുള്ള താരമാണ് സഞ്ജുവെന്നും മാത്യു ഹെയ്ഡനും പറഞ്ഞു.
സഞ്ജുവിനെ ഒരു കാരണവശാലും ടീമിൽ നിന്ന് മാറ്റിനിർത്തരുതെന്നാണ് ക്രിക്കറ്റ് വിദഗ്ധരുടെയും ആരാധകരുടെയും വാദം. ഇന്ത്യൻ ടീമിനാണ് സഞ്ജുവിനെ മാറ്റി നിർത്തിയാൽ നഷ്ടമെന്ന് പറയുന്നവരുമുണ്ട്. ഇതിനിടെ മുൻ താരങ്ങളിൽ പലരും ടി20 ലോകകപ്പിനുള്ള ഇന്ത്യൻ ടീമിനെ പ്രവചിക്കുന്നുണ്ട്. സഞ്ജു ഉൾപ്പെടുന്ന ടീമും ഉൾപ്പെടാത്ത ടീമുകളും മിക്കവരും പ്രവചിക്കുന്നുണ്ട്. രണ്ടുദിവസത്തിനകം ടീമിനെ പ്രഖ്യാപിക്കും.