ഏറെ കാലത്തെ കാത്തിരിപ്പിനൊടുവിൽ ഇന്ത്യയുടെ ലോകകപ്പ് ടീമിലേക്ക് ഒരു മലയാളി വന്നെത്തിയ ദിവസം. ഇത്തവണ ഇന്ത്യ കപ്പുയർത്തുമെന്നാണ് ആരാധകരുടെ പക്ഷം. 15 അംഗ ടീമിൽ വിക്കറ്റ് കീപ്പറായി സഞ്ജു എത്തുമ്പോൾ പ്രതീക്ഷകൾ ഏറെയാണ്. ഐപിഎല്ലിൽ രാജസ്ഥാൻ റോയൽസിനായി മികച്ച പ്രകടനം കാഴ്ചതോടെയാണ് സഞ്ജുവിന് ദേശീയ ടീമിലേക്കുള്ള വാതിൽതുറന്നത്. 9 ഇന്നിംഗ്സിൽ നിന്ന് 77 ശരാശരിയിൽ 385 റൺസ്. സ്‌ട്രൈക്ക് റേറ്റിൽ രണ്ടാമത്. സമൂഹമാദ്ധ്യമങ്ങളിലും ട്രോളുകൾ കൊണ്ട് ആഘോഷിക്കുകയാണ് ആരാധകർ!
2022ലെ ഐപിഎല്ലിൽ മികച്ച പ്രകടനം കാഴ്ചവച്ചിട്ടും സഞ്ജുവിന് ലോകകപ്പ് ടീമിൽ ഇടംലഭിച്ചിരുന്നില്ല. പകരം ദിനേശ് കാർത്തികിനെയാണ് അന്ന് ടീമിൽ ഉൾപ്പെടുത്തിയത്. പലപ്പോഴും ടീമിൽ അവസരം ലഭിച്ചിട്ടും ബെഞ്ചിലിരുന്ന സഞ്ജു 9 വർഷങ്ങൾക്കിടെ ആദ്യമായാണ് ലോകകപ്പ് ടീമിൽ ഇടംനേടുന്നത്. ഇതിനിടെ നടന്ന 2016, 2021, 2022 ടി20 ലോകകപ്പുകളിലും 2019, 2023 ഏകദിന ലോകകപ്പുകളിലും സഞ്ജുവിനെ പരിഗണിച്ചിരുന്നില്ല. 13 വർഷങ്ങൾക്ക് ശേഷം ഇന്ത്യൻ ടീമിലേക്ക് മലയാളിയെത്തുമ്പോൾ കിരീടം രാജ്യത്ത് എത്തുമെന്ന് കരുതുന്ന ആരാധകരും ഏറെയാണ്.
എസ് ശ്രീശാന്തിന് ശേഷം ലോകകപ്പ് കളിക്കാനൊരുങ്ങുന്ന മലയാളിയാണ് സഞ്ജു. 2015-ൽ ജൂലൈയിൽ സിംബാബ്‌വെയ്‌ക്കെതിരെയാണ് സഞ്ജു സാംസൺ ഇന്ത്യക്കായി ട്വന്റി20യിൽ അരങ്ങേറ്റിയത്. ഇതുവരെ 25 രാജ്യാന്തര മത്സരങ്ങളിൽനിന്നായി 374 റൺസ് താരം നേടിയിട്ടുണ്ട്.
