”കുട്ടിയുടെ മൂക്കത്താണല്ലോ ശുണ്ഠി” എന്ന് പൊതുവെ കളിയാക്കി പറയുന്നത് നാം കേട്ടിരിക്കും. പരിഹാസമായിട്ടാണ് ഇങ്ങനെ പറയുന്നതെങ്കിലും നിസാര കാര്യങ്ങൾക്ക് പോലും പെട്ടന്ന് പ്രകോപിതരാവുന്ന പലരും നമുക്ക് ചുറ്റുമുണ്ട്. അത്തരത്തിൽ ഒന്നു പറഞ്ഞാൽ രണ്ടാമത്തേതിന് വാളെടുക്കുന്നവരാണ് നിങ്ങളെങ്കിൽ ഇതറിഞ്ഞോളൂ..
പെട്ടന്ന് ദേഷ്യപ്പെടുന്ന വ്യക്തികളിൽ ഹൃദയാഘാതം സംഭവിക്കാനുള്ള സാധ്യത കൂടുതലാണെന്ന് പഠനങ്ങൾ പറയുന്നു. കൊളംബിയ യൂണിവേഴ്‌സിറ്റി ഇർവിംഗ് മെഡിക്കൽ സെന്റർ, യേൽ സ്‌കൂൾ ഓഫ് മെഡിസിൻ, ന്യൂയോർക്കിലെ സെന്റ് ജോൺസ് യൂണിവേഴ്‌സിറ്റി തുടങ്ങിയ ഗവേഷക സ്ഥപനങ്ങളിൽ നടത്തിയ പഠനങ്ങളിലാണ് ഇത് സംബന്ധിച്ച വിവരങ്ങൾ ഉൾപ്പെടുന്നത്.
പെട്ടന്നുണ്ടാകുന്ന ചെറിയ കോപം പോലും ഹൃദയാരോഗ്യത്തെ വഷളാക്കുന്നതാണെന്ന് വിദഗ്ധർ പറയുന്നു. ഇത് ഹൃദ്രോഗങ്ങൾ, ഹൃദയാഘാതം, പക്ഷാഘാതം എന്നിവയ്‌ക്കും വഴിവയ്‌ക്കുന്നു. ഇതിനുപുറമെ അമിതമായ ദേഷ്യം രക്തക്കുഴലുകളിൽ സമ്മർദ്ദമുണ്ടാക്കുകയും ഇത് പ്രവർത്തനത്തെ ബാധിക്കാനും കാരണമാകുന്നുണ്ടെന്നാണ് പഠനങ്ങൾ പറയുന്നത്. പെട്ടന്നുണ്ടാകുന്ന പ്രകോപനങ്ങൾ മറ്റുള്ളവരെ അപായപ്പെടുത്തുന്നതിനും സ്വയം അപകടത്തിൽ ചാടുന്നതിനും കാരണമാകും. ഇത്തരം സ്വഭാവം നിങ്ങളിൽ പ്രകടമാകുന്നുണ്ടെങ്കിൽ സ്വയം നിയന്ത്രിക്കാൻ ശ്രമിക്കുകയോ സൈക്കോളജിസ്റ്റിന്റെ സഹായം തേടാനോ ശ്രമിക്കണം.
