ന്യൂഡൽഹി: തെരഞ്ഞെടുപ്പ് കാലത്ത് രാഷ്ട്രീയ നേതാക്കളെ ഉൾപ്പെടുത്തികൊണ്ടുള്ള പല മീമുകൾ സോഷ്യൽ മീഡിയകളിൽ വളരെ പെട്ടന്ന് വൈറലാകാറുണ്ട്. അത്തരത്തിൽ രണ്ട് മീമുകളാണ് ഇപ്പോൾ സോഷ്യൽ മീഡിയയിൽ വൈറലാവുന്നത്. പ്രധാനമന്ത്രി നരേന്ദ്രമോദിയുടെയും ബംഗാൾ മുഖ്യമന്ത്രി മമത ബാനർജിയുടെയും മീമുകളാണവ. പ്രധാനമന്ത്രി നൃത്തം ചെയ്യുന്നതിന്റെ മീം വൈറലായതോടെ മീമിന്റെ സ്രഷ്ടാവിനെ അഭിനന്ദിച്ചിരിക്കുകയാണ് പ്രധാനമന്ത്രി.
” നിങ്ങളെ പോലെ തന്നെ ഞാനും എന്റെ നൃത്തം നന്നായി ആസ്വദിച്ചു. ഇത്തരം സർഗ്ഗാത്മക കഴിവുകൾ കാണുമ്പോൾ സന്തോഷം തോന്നുന്നു.”- മീം റീട്വീറ്റ് ചെയ്ത് പ്രധാനമന്ത്രി കുറിച്ചു. മാസ് എൻട്രി നടത്തി സ്റ്റേജിൽ നൃത്തം ചെയ്യുന്ന പ്രധാനമന്ത്രിയുടെ മീമാണ് പങ്കുവച്ചത്.
കൃഷ്ണ എന്ന എക്സ് ഉപയോക്താവിന്റെ അക്കൗണ്ടിൽ നിന്നാണ് വീഡിയോ പോസ്ററ്റ് ചെയ്തിരിക്കുന്നത്. ” ഈ വീഡിയോ ഞാൻ പോസ്റ്റ് ചെയ്യുന്നു. കാരണം ‘ ഡിക്റ്റേറ്റർ’ എന്നെ അറസ്റ്റ് ചെയ്യില്ലെന്ന ഉറപ്പ് എനിക്കുണ്ട്.” എന്ന അടിക്കുറിപ്പോടെയാണ് വീഡിയോ പോസ്റ്റ് ചെയ്തത്.
Posting this video cuz I know that ‘THE DICTATOR’ is not going to get me arrested for this. pic.twitter.com/8HY32d4R2y
— Krishna (@Atheist_Krishna) May 6, 2024
അതേസമയം സോഷ്യൽ മീഡിയയിലൂടെ പ്രചരിച്ച മമത ബാനർജിയുടെ മീമിന്റെ സ്രഷ്ടാവിനെ കണ്ടെത്താൻ വ്യാപക പരിശോധനയാണ് ബംഗാളിൽ നടക്കുന്നത്. മീം നിർമിച്ച വ്യക്തിയുടെ പേരും വിലാസവും നൽകിയില്ലെങ്കിൽ സർക്കാർ കടുത്ത നടപടിയെടുക്കുമെന്ന് പൊലീസ് നിർദേശം നൽകി. മമതയുടെയും പൊലീസിന്റെ ഇത്തരം നീക്കങ്ങൾക്കെതിരെ വ്യാപക വിമർശനവും സമൂഹ മാദ്ധ്യമങ്ങളിൽ ഉയരുന്നുണ്ട്.
