തഞ്ചാവൂർ: തമിഴ് നാട്ടിലെ തഞ്ചാവൂർ ജില്ലയിലെ ബൂത്തലൂരിനടുത്തുള്ള വയലിൽ മണ്ണിനടയിൽ നിന്ന് ചോള കാലഘട്ടത്തിലെ നന്ദി, വിഷ്ണു ശിൽപങ്ങളും പല്ലവ കാലത്തെ ശിലാശാസനങ്ങളും കണ്ടെത്തി.
തഞ്ചാവൂർ ജില്ലയിലെ ബൂത്തലൂരിനടുത്ത് വയലിൽ പാതി കുഴിച്ചിട്ടനിലയിൽ വിഗ്രഹങ്ങൾ കണ്ടതായി ലഭിച്ച വിവരത്തിന്റെ അടിസ്ഥാനത്തിലാണ്
പരിശോധന നടത്തിയത്. ബുത്തല്ലൂരിനടുത്തുള്ള സിത്തിരൈക്കുടി ഗ്രാമത്തിലെ പ്രൊഫസറായ എസ് സത്യ നൽകിയ വിവരത്തിന്റെ അടിസ്ഥാനത്തിൽ ചരിത്രകാരൻ മണി മാരനും സ്കൂൾ അധ്യാപകരായ തില്ലൈ ഗോവിന്ദരാജനും കെ ജയലക്ഷ്മിയും ഗ്രാമത്തിൽ പരിശോധന നടത്തുകയായിരുന്നു.
എ ഡി 9-10 നൂറ്റാണ്ടിലെ ചോള കാലഘട്ടത്തിലാണ് കണ്ടെത്തിയ നന്ദി. നന്ദിയുടെ കഴുത്ത് മുത്തുകൾ ചേർത്തു കൊണ്ട് മനോഹരമായി രൂപകൽപ്പന ചെയ്തിട്ടുണ്ട്. ഇത് കൂടാതെ, ആനന്ദ കാവേരി കനാലിന്റെ അകത്തെ തെക്കേക്കരയിൽ മൂന്നടിയോളം ഉയരമുള്ള മഹാവിഷ്ണുവിന്റെ ഒരു വിഗ്രഹം പകുതി കുഴിച്ചിട്ട നിലയിലും കണ്ടെത്തി. പ്രദേശത്തെ ഒരു വലിയ ശിവക്ഷേത്രം പൂർണമായും തകർന്നിരിക്കാം എന്നതാണ് ഇതിൽ നിന്ന് മനസ്സിലാകുന്നത് എന്ന് വിദഗ്ധർ അഭിപ്രായപ്പെട്ടു. നന്ദി വിഗ്രഹത്തിന് താഴെ ഒരു ലിഖിതമുണ്ടെന്നും ഇത് എട്ടാം നൂറ്റാണ്ടിലേതായിരിക്കുമെന്നും മണിമാരൻ പറഞ്ഞു.
അതേസമയം, വിഷ്ണു വിഗ്രഹം കണ്ടെത്തിയ സ്ഥലത്തിന് സമീപം, എട്ടാം നൂറ്റാണ്ടിലെ ഒരു ക്ഷേത്രത്തിൽ ഇപ്പോഴും ആരാധന നടക്കുന്നുണ്ടെന്ന് പുരാവസ്തു ഗവേഷകർ പറഞ്ഞു. തഞ്ചാവൂർ ജില്ലയിൽ ആദ്യമായിട്ടാണ് ക്ഷേത്രത്തിന്റെ നന്ദിയുടെ താഴെ പല്ലവ ലിഖിതങ്ങൾ കൊത്തിവെച്ചിരിക്കുന്നത് കണ്ടെത്തുന്നത്, മാരൻ കൂട്ടിച്ചേർത്തു.
