ജിസ് ജോയിയുടെ സംവിധാനത്തിൽ ആസിഫ് അലിയും ബിജു മോനോനും വീണ്ടും ഒരുമിക്കുന്ന ചിത്രമാണ് തലവൻ. ത്രില്ലർ ഗണത്തിൽപ്പെടുന്ന ചിത്രത്തിന്റെ ഏറ്റവും പുതിയ വാർത്ത പങ്കുവച്ചിരിക്കുകയാണ് അണിയറ പ്രവർത്തകർ. പോസ്റ്റ് പ്രൊഡക്ഷൻ ജോലികൾ പുരോഗമിക്കുന്ന ചിത്രത്തിന്റെ റിലീസ് തീയതി പ്രഖ്യാപിച്ചു.
മേയ് 24ന് ചിത്രം തിയേറ്ററുകളിലെത്തും. രണ്ട് റാങ്കുകളിലുള്ള പൊലീസ് ഉദ്യോഗസ്ഥർക്കിടയിലുണ്ടാകുന്ന പ്രശ്നങ്ങളാണ് ചിത്രത്തിലൂടെ പറയുന്നത്. മാസങ്ങൾക്ക് മുമ്പ് പുറത്തുവന്ന ചിത്രത്തിന്റെ ടീസർ ഏറെ ശ്രദ്ധ നേടിയിരുന്നു. ആസിഫ് അലി- ബിജു മേനോൻ കോംബോ ഒരുമിച്ചപ്പോഴെല്ലാം ഹിറ്റുകളാണ് പ്രേക്ഷകർക്ക് ലഭിച്ചത്. പുതിയ ചിത്രത്തിലും പ്രേക്ഷകർ ഇതേ പ്രതീക്ഷയാണ് വെച്ചുപുലർത്തുന്നത്.
അനുശ്രീ, മിയ തുടങ്ങിയവരാണ് ചിത്രത്തിലെ നായികമാർ. ദിലീഷ് പോത്തനും റഹ്മാനും ചിത്രത്തിൽ പ്രധാന വേഷങ്ങളിൽ എത്തുന്നുണ്ട്.
അരുൺ നാരായൺ, സിജോ സെബാസ്റ്റ്യൻ എന്നിവർ ചേർന്നാണ് ചിത്രം നിർമ്മിക്കുന്നത്. കോട്ടയം നസീർ, ശങ്കർ രാമകൃഷ്ണൻ, ജോജി കെ. ജോൺ, ദിനേശ്, അനുരൂപ്, നന്ദൻ ഉണ്ണി, ബിലാസ് എന്നവരാണ് ചിത്രത്തിലെ മറ്റ് അഭിനേതാക്കൾ.
