ഒളിമ്പ്യനും ജാവലിൻ ത്രോ ലോകചാമ്പ്യനുമായ നീരജ് ചോപ്ര ഇന്ത്യയിൽ മത്സരിക്കാനെത്തുന്നു. മൂന്നു വർഷത്തിനിടെ ആദ്യമായാണ് താരം ഇന്ത്യയിൽ മത്സരിക്കാൻ എത്തുന്നത്. മെയ് 12 മുതൽ 15 വരെ ഭുവനേശ്വറിൽ നടക്കുന്ന ദേശീയ ഫെഡറേഷൻ കപ്പിലാണ് ഒളിമ്പ്യൻ പങ്കെടുക്കുക. ദോഹയിലെ ഡയമണ്ട് ലീഗിൽ സീസണ് തുടക്കമിട്ട ശേഷമാകും താരം ഇന്ത്യയിലെത്തുക.
നീരജിനൊപ്പം കിഷോർ കുമാർ ജനയും ആഭ്യന്തര മത്സരത്തിൽ പങ്കെടുക്കുമെന്ന് അത്ലറ്റിക് ഫെഡറേഷൻ എക്സിൽ വ്യക്തമാക്കി. നീരജ് പങ്കെടുക്കുന്ന കാര്യം അദ്ദേഹത്തിന്റെ പരിശീലകനും സ്ഥിരീകരിച്ചിരുന്നു.28-കാരൻ കിഷോർ ജനയും ഡയമണ്ട് ലീഗിൽ മത്സരിക്കുന്നുണ്ട്. ഹാങ്ചോ ഏഷ്യൻ ഗെയിംസിൽ നീരജ് സ്വർണം നേടിയപ്പോൾ വെള്ളി നേടിയത് കിഷോർ ആയിരുന്നു.
2021 മാർച്ചിൽ നടന്ന ഫെഡറേഷൻ കപ്പിലാണ് നീരജ് ഒടുവിൽ ഇന്ത്യയിൽ മത്സരിച്ചത്. അന്ന് 87.80 മീറ്റർ ദൂരം താണ്ടി സ്വർണം നേടിയിരുന്നു. ഇതിന് പിന്നാലെയാണ് ടോക്കിയോ ഒളിമ്പിക്സിൽ രാജ്യത്തിന് അഭിമാനായി സ്വർണം അണിഞ്ഞത്. പിന്നാലെ ഡയമണ്ട് ലീഗിലും ചാമ്പ്യനായി. 2023 ൽ ലോകചാമ്പ്യൻ പട്ടവും നേടി.
