വാലറ്റ് ആപ്പ് ഇന്ത്യയിൽ അവതരിപ്പിച്ച് ഗൂഗിൾ. ഡിജിറ്റൽ വിവരങ്ങൾ സൂക്ഷിക്കാൻ ആപ്പ് സഹായിക്കുന്നു. രാജ്യത്തെ ആൻഡ്രോയിഡ് ഉപഭോക്താക്കൾക്കാണ് വാലറ്റ് ആപ്പ് ലഭ്യമാകുക. ലോയൽറ്റി കാർഡുകൾ, ട്രാൻസിറ്റ് പാസുകൾ, . ഡിജിറ്റൽ കാർ കീ, മൂവി ടിക്കറ്റുകൾ, റിവാർഡ് കാർഡുകൾ എന്നിവയെല്ലാം സൂക്ഷിക്കാൻ ഗൂഗിൾ വാലറ്റ് ഉപയോഗിച്ച് സാധിക്കും.
യുപിഐ അടിസ്ഥാനമായുള്ള ഗൂഗിൾ പേയിൽ നിന്ന് വ്യത്യസ്തമായി കോൺടാക്ട്ലെസ് പേയ്മെന്റ് മാത്രം ലക്ഷ്യമിട്ടുള്ള ആപ്പാണ് ഗൂഗിൾ വാലറ്റ്. ക്രെഡിറ്റ്/ഡെബിറ്റ് കാർഡുകൾ തുടങ്ങിയവ ഉപയോഗിച്ച് സുരക്ഷിത കോൺടാക്റ്റ്ലെസ് പേമെന്റുകളാവും അനുവദിക്കുന്നത്. നിയർഫീൽ‌ഡ് കമ്യൂണിക്കേഷൻ സംവിധാനമുള്ള ഫോണുകളിൽ മാത്രമേ ഗൂഗിൾ വാലറ്റ് പ്രവർത്തിക്കുകയുള്ളൂ.
ഗൂഗിൾപേ സ്വീകരിക്കുന്ന സ്റ്റോറുകളിൽ വേഗത്തിൽ പണമടയ്‌ക്കുന്നതിനായി ഡെബിറ്റ് അല്ലെങ്കിൽ ക്രെഡിറ്റ് കാർഡുകൾ ഗൂഗിൾ വാലറ്റിൽ ശേഖരിക്കാനാകും. യഥാർത്ഥ കാർഡ് നമ്പർ ഒരിക്കലും ഇത് വ്യാപാരിയുമായി പങ്കിടില്ല. പിവിആർ ഇനോക്‌സ്, മേക് മൈ ട്രിപ്പ്, എയർ ഇന്ത്യ, ഷോപ്പേഴ്‌സ് സ്റ്റോപ്പ്, ബിഎംഡബ്ല്യൂ ഉൾപ്പടെ 20 സ്ഥാപനങ്ങൾ വാലറ്റിന് വേണ്ടി ഗൂഗിളുമായി സഹകരിക്കുന്നുണ്ട്. കൂടുതൽ സ്ഥാപനങ്ങൾ ഭാവിയിൽ പങ്കാളികളാവും. എന്നാൽ പണമിടപാടുകൾ നടത്താനുള്ള സൗകര്യം ഇന്ത്യയിലെ ഗൂഗിൾ പേ വാലറ്റിൽ ഉണ്ടാവില്ല.
ഗൂഗിൾ പ്ലേ സ്റ്റോറിൽ നിന്ന് ഗൂഗിൾ വാലറ്റ് ഡൗൺലോഡ് ചെയ്യാവുന്നതാണ്. ഇന്ത്യയിൽ വിൽക്കുന്ന പിക്‌സൽ ഫോണുകളിൽ വാലറ്റ് ആപ്പ് പ്രീലോഡ് ചെയ്ത് ലഭിക്കും.
