ലക്നൗ: പ്രധാനമന്ത്രിക്കെതിരെ ഡൽഹി മുഖ്യമന്ത്രി അരവിന്ദ് കെജ്രിവാൾ നടത്തിയ കുപ്രചരണങ്ങൾക്ക് മറുപടി നൽകി ഉത്തർപ്രദേശ് മുഖ്യമന്ത്രി യോഗി ആദിത്യനാഥ്. പ്രധാനമന്ത്രി നരേന്ദ്രമോദിക്ക് രാജ്യത്തൊട്ടാകെ ലഭിക്കുന്ന പിന്തുണ കണ്ട് പ്രതിപക്ഷ പാർട്ടികൾ ഭയന്നിരിക്കുകയാണ്. ലോക്സഭാ തെരഞ്ഞെടുപ്പ് ഫലം പ്രഖ്യാപിച്ച ശേഷവും പ്രതിപക്ഷം ഇത്തരത്തിലുള്ള പാഴ്വാക്കുകൾ പറഞ്ഞുകൊണ്ടിരിക്കുമെന്നും അദ്ദേഹം പറഞ്ഞു.
‘തെരഞ്ഞെടുപ്പിൽ പരാജയപ്പെടുമെന്ന് പ്രതിപക്ഷത്തിന് ഉറപ്പാണ്. അതുകൊണ്ടാണ് പ്രധാനമന്ത്രിയുടെ പ്രായത്തെ കുറിച്ച് പറഞ്ഞുവരെ വിമർശിക്കുന്നത്. അദ്ദേഹം ഭാരതത്തെ പരമപ്രധാനമായാണ് കാണുന്നത്, അത് രാജ്യത്തെ ജനങ്ങൾക്ക് വ്യക്തമായി അറിയുന്ന കാര്യവുമാണ്. അദ്ദേഹത്തിന്റെ നേതൃത്വത്തിലുള്ള ഭരണത്തിന്റെ മൂന്നാം ഘട്ടത്തിൽ രാജ്യം പുതിയ ഉയരങ്ങൾ സ്വന്തമാക്കുമെന്നത് ഉറപ്പാണ്. 140 കോടി ഇന്ത്യാക്കാരുടെ പ്രിയപ്പെട്ട നേതാവാണ് നരേന്ദ്രമോദി. അദ്ദേഹത്തിന്റെ കുടുംബാംഗങ്ങളാണെന്നതിൽ ഞങ്ങൾ അഭിമാനിക്കുന്നെന്നും’ യോഗി ആദിത്യനാഥ് പറഞ്ഞു.
ജാമ്യം ലഭിച്ച് പുറത്തിറങ്ങിയ ശേഷം ഇന്നലെ ഒരു പൊതു യോഗത്തിലാണ് കെജ്രിവാൾ പ്രധാനമന്ത്രിക്കെതിരെ പ്രായം പരാമർശിച്ചു കൊണ്ടുള്ള കുപ്രചരണങ്ങൾ നടത്തിയത്. ഇതിന് തക്കതായ മറുപടി അമിത് ഷായും നൽകിയിരുന്നു.
