തെലങ്കാനയിൽ സിംഗിൾ തിയേറ്ററുകൾ രണ്ടാഴ്ചത്തേക്ക് താത്കാലികമായി അടച്ചിടുന്നു. സംക്രാന്തിക്ക് ശേഷം വമ്പൻ ചിത്രങ്ങളൊന്നും റിലീസിന് എത്താത്തതിനാലാണ് തിയേറ്ററുകൾ അടച്ചിടാൻ ഒരുങ്ങുന്നത്.
പത്തോ പതിനഞ്ചോ ദിവസം തിയേറ്ററുകൾ അടച്ചിടുമെന്നാണ് തിയേറ്റർ അസോസിയേഷൻ അറിയിച്ചിരിക്കുന്നത്. മുൻ വർഷങ്ങളെ അപേക്ഷിച്ച് ഇത്തവണ ഏപ്രില്-മെയ് മാസങ്ങളിൽ തിയറ്ററുകളിലെത്തിയ കാണികളുടെ എണ്ണവും കുറവായിരുന്നു. ഇതാണ്, അടച്ചിടലിന്റെ വക്കിൽ തിയേറ്റർ ഉടമകളെ എത്തിച്ചത്.
പ്രഭാസ് നായകനാവുന്ന കല്ക്കി, അല്ലു അര്ജുന് ചിത്രം പുഷ്പ 2, രാം ചരണ് നായകനാവുന്ന ഗെയിം ചേഞ്ചര് എന്നീ ചിത്രങ്ങളാണ് ഇനി അടുത്തതായി റിലീസിന് ഒരുങ്ങുന്ന വമ്പന് ചിത്രങ്ങള്. ഈ ചിത്രങ്ങളുടെ വരവോടെ മാത്രമേ പ്രതിസന്ധി നീങ്ങൂ എന്നാണ് ചെറുകിട തിയറ്റർ ഉടമകൾ പറയുന്നത്.
