ഇന്ത്യ കണ്ട എക്കാലത്തെയും മികച്ച ബാറ്റർമാരിൽ ഒരാളാണ് വിരാട് കോലി. വിരമിക്കലിനെ കുറിച്ച് മുമ്പ് മൗനം പാലിച്ചിരുന്ന കോലി ഇപ്പോൾ അതേകുറിച്ച് മനസുതുറന്നിരിക്കുകയാണ്. ക്രിക്കറ്റിൽ നിന്ന് വിരമിച്ച ശേഷം നീണ്ട വിശ്രമം എടുക്കുമെന്നാണ് വെളിപ്പെടുത്തൽ. ആർസിബിയുടെ റോയൽ ഗാല ഡിന്നറിനിടെയായിരുന്നു പ്രതികരണം.
വളരെ ലളിതമായ ഒരു ചോദ്യമാണിത്. കായിക താരമെന്ന നിലയിൽ ഒരു ദിവസം കരിയർ അവസാനിക്കുമെന്ന ബോധ്യം എല്ലാവരെയും പോലെ തനിക്കുമുണ്ട്. വിരമിക്കൽ എങ്ങനെയാകുമെന്നോ പ്രത്യേക ദിവസത്തിലായിരിക്കുമോ
ഒന്നും നേടാൻ കഴിയാതെ അവസാനിപ്പിക്കേണ്ടി വരുമോ എന്നൊന്നും ഞാൻ ചിന്തിക്കാൻ ആഗ്രഹിക്കുന്നില്ല. സ്ഥിരമായി എപ്പോഴും ഒരേ പ്രകടനം പുറത്തെടുക്കാൻ തനിക്ക് കഴിയില്ലെന്നും കോലി പറഞ്ഞു. വിരമിക്കൽ വരെ ക്രിക്കറ്റിന് വേണ്ടി തനിക്ക് ചെയ്യാനാവുന്നതെല്ലാം ചെയ്യും. അതാണ് മുന്നോട്ട് നയിക്കുന്നത്. കരിയറിനെ കുറിച്ചോർത്ത് പിന്നീട് പശ്ചാത്തപിക്കാൻ താൻ ഒരുക്കമല്ലെന്നും കോലി കൂട്ടിച്ചേർത്തു.
ആദ്യ ഏട്ട് മത്സരങ്ങൾ തോറ്റ ആർസിബി പിന്നീട് ബാറ്റിംഗിലും ബൗളിംഗിലും തിളങ്ങി തുടർച്ചയായ മത്സരങ്ങൾ ജയിച്ച് പ്ലേ ഓഫ് സാധ്യതകൾ സജീവമാക്കുന്ന കാഴ്ചയാണ് ആരാധകർ കണ്ടത്. സ്ഥിരതയാർന്ന പ്രകടനം കാഴ്ചവയ്ക്കുന്ന വിരാട് കോലിയിൽ തന്നെയാണ് ആരാധകരുടെ പ്രതീക്ഷ. 13 ഇന്നിംഗ്സുകളിൽ നിന്നായി 661 റൺസുമായി ഓറഞ്ച് ക്യാപ് പട്ടികയിൽ ഒന്നാമതാണ് താരം. ഇതിൽ ഒരു സെഞ്ച്വറി അഞ്ച് അർദ്ധ സെഞ്ച്വറിയും ഉൾപ്പെടുന്നു. 12 പോയിന്റുമായി പോയിന്റ് പട്ടികയിൽ ആറാമതാണ് ആർസിബി.
