ഐപിഎല്ലിൽ നിന്ന് ഈ സീസണോടെ എംഎസ് ധോണി വിരമിക്കുമോ എന്ന ആരാധകരുടെ ചോദ്യത്തോട് പ്രതികരിച്ച് വിരാട് കോലി. ഒരുപക്ഷേ ധോണിക്കൊപ്പം താൻ കളിക്കുന്ന അവസാന മത്സരത്തിനാകും ചിന്നസ്വാമി സ്റ്റേഡിയം സാക്ഷ്യം വഹിക്കുകയെന്നാണ് കോലി പറഞ്ഞത്.
രാജ്യത്തെ ഓരോ സ്റ്റേഡിയങ്ങളിലും അദ്ദേഹം കളിക്കാനിറങ്ങുന്നത് ആരാധകരെ ആവേശത്തിലാഴ്ത്താറുണ്ട്. ഞങ്ങൾ ഒരുമിച്ച് വീണ്ടും ബെംഗളൂരുവിൽ കളിക്കാനിറങ്ങുകയാണ്. ഒരുപക്ഷേ അവസാനത്തേതാകും. ആ വികാരത്തെ കുറിച്ച് നിങ്ങൾക്ക് മനസിലാകില്ല. അദ്ദേഹവുമായി ഒരുപാട് മികച്ച ഓർമ്മകൾ എനിക്കുണ്ട്. ഞങ്ങൾ ഒരുമിച്ച് രാജ്യത്തിനായി മികച്ച കൂട്ടുകെട്ട് പടുത്തുയർത്തിയിട്ടുണ്ട്. ആരാധകർക്ക് ഒരിക്കൽ കൂടി ഞങ്ങളെ ഒരുമിച്ച് കാണാനുള്ള അവസരമാണിതെന്നും കോലി ജിയോ സിനിമയിൽ പറഞ്ഞു.
ഏകദിനത്തിലും ടി20യിലും എന്തിനാണ് മത്സരം അവസാന ഓവറിലേക്ക് കൊണ്ടുപോകുന്നതെന്ന് ആരാധകർ അദ്ദേഹത്തിനെതിരെ വിമർശനമുന്നയിക്കാറുണ്ടായിരുന്നു. പക്ഷേ എത്രയോ മത്സരങ്ങളിൽ അദ്ദേഹം രാജ്യത്തിന് മഹത്തായ വിജയങ്ങൾ സമ്മാനിച്ചു. അദ്ദേഹം ചെയ്യാൻ പോകുന്നതിനെക്കുറിച്ചുള്ള ധാരണങ്ങൾ അദ്ദേഹത്തിന് മാത്രമാകുമുണ്ടാകുക. അവസാന ഓവർ വരെ ക്രീസിലുണ്ടെങ്കിൽ മത്സരം ജയിക്കുമെന്ന് മഹി ഭായിക്ക് അറിയാം. പക്ഷേ ഞാൻ മത്സരം അവസാന ഓവറിന് മുമ്പേ തീർക്കാനാണ് ശ്രമിക്കുന്നത്. എതിരാളികളെ ഭയപ്പെടുത്തുന്ന രീതിയിലാണ് അവസാന ഓവർ വരെയുള്ള ക്രീസിലെ അദ്ദേഹത്തിന്റെ പ്രകടനമെന്നും കോലി കൂട്ടിച്ചേർത്തു.
